Van Brabant die excellente cronike

Dat .xxij. capitel. Van sinte Wijden van Anderlecht, ende vanden eerwerdigen Wonodulphus deken van Anderlecht

OMtrent der tijt van Gherberga grauinne van Bruessel hertoge Karels dochter so leefde in brabant de heylige confessoer sinte wyde opt dorp

[fol. 23r]

op geuoedt, die van iongen kinde opwies in allen goede zeden sonderlinge in ootmoedicheyt ende barmherticheit ouer die arme Ende hi plach sekere tiden inden dach te verkiesen tot bedingen ende tot visitacie vanden siecken, dien hi veel aelmosenen gaf na zijn vermogen, des verwonderde hem sijn vader ende die gebueren vander gracien gods die in hem scheen. Als hi tot mans ouder quam doe begonst hi die menschen te vlyeden ende hem seluen te vertijenne, ende met heylige menschen sprake te hebben Ende lange sueckende een heymelijcke stede om in eenicheden gode te dienen. So quam hi tot Laken, ende aldaer doende sijn ghebet inder kercken van onser lieuer vrouwen der moeder gods, so aenmercte die priester vander kercken sijn gelaet ende sijn stichtich wesen, ende badt hem dat hi dair woud bliuen wonende inder dienst sijnder kercken twelc sinte wijt geerne dede gode danckende, soe bleef hi daer een wijle tijts gode vierichlijc dienende in armoeden in heyligen wakingen, ghebeden, abstinencien, ende in bewijsinge der ontfermherticheyt ouer die armen. Daer nae reysde hy pelgrimagie tot Rome, ende int heylich landt tot Jherusalem. Ende in sijn gheselscap was die weerdighe man wonodulphus deken van Anderlecht, daer af hier na gheseyt sal worden. Ende so .vij. iaren lanck ghinck hy visiteren die plaetsen der heyligen in allen landen. Daer na met groten arbeyt ende siecten vanden roden melysoen so quam hi tot Anderlecht, daer hi ontfangen wert in eens armen menschen huys ter herberghen. Maer als dat vernam die vicedeken van Anderlecht so ghinck hi met sommige clercken tot den heylighen man sinte wijde, ende met tranen bracht hi hem in sijn huys, daer hy en onderhielt tot sijnder doot toe, die cortelinge gebuerde, want des nachts vanden eersten sondach daer na so quam een hemels licht ouer den heylighen man daer alle dat huys af verlicht was. Ende men hoorde een stemme seggende Comt mijn geminde om te hebben de crone der ewiger blijtscap Ter stont bekenden si die int huys waren dat hi verscheyden was. Ende die canonicken van anderlecht deden sinen heiligen lichaem ter eerden, daer hi tot noch toe doende is door zijn verdienste wonderlike schone mirakelen

Mer tis te weten dat sinte wijds lichaem simpelic begrauen lach lange tijt, so dat hem geen reuerentie bewesen en wert, want niet alleen die menschen, mer ooc die beesten traden ouer sijn graf So wilde god thonen van wat verdiente sinte wide was want sommige beesten gaende ouer sijn graff werden beseten vanden bosen viant tot datse storuen Ende so dede die here vanden dorpe Onulphus geheeten midts desen sijn graf op luyken op dat die geen die daer verbi passeerden dat eeren souden Mer twee rustieren die den tuyn daer om loken werden bi ingeuen des duuels lachende ende seyden tot malcander Laet ons desen ouden man die corts gestoruen is hier in sluyten dat hi ons niet en ontlope. welcke spottelike woorden ter stont gepinicht werden want ter stont ontbraken hem haer crachten so datse niet connende voldoen weder thuyswaert gingen ende deen van hem sterf te middernacht mit groter pinen, ende die ander wtsinnig sijnde ende hem seluen quetsende belijde dat hi den heyligen sinte wyde hadde ge-

[fol. 23v]

blasphemeert ende so sterf hi des ander dages. Dit exempel was daer na den menigen een sake harer salicheyt, want die sommige daer toe verwect sijnde in haren slape, sommige werden gedragen, die sommige geuoert ende offerden barrende kerssen opt graf vanden heyligen man, ende haer ghebet daer doende so werden si ghesont

Daer nae wert een kercke gemaect op sijn graf, daer hi van verre ende van bi dicwil gheuisiteert wert van veele crancke ende siecke menschen die ghenesen werden van haren siecten. Daer nae soe wert die kercke weder af ghebroken ende wert vermeerdert, ende bi consente vanden eerwerdighen bisscop Gheraert van Camerijke so wert dat heylich ghebeente van sinte wijde ghestelt inden midden vander kercken met groter deuocien Ende voort aen so vermeerderden altijt die tekenen ende miraculen die god doer sijnen heyligen wrachte ouer alrehande menschen tot noch toe, die veel te lange souden vallen om te verclaren, want wie hem deuotelijck beueelt der hulpen van sinte Wijden met goeden gheloue hi wert ghesont

Ende als vanden eerwerdigen wonodulphus deken van Anderlecht dair hier voor af geseit is suldi weten, dat na dat hi met sinte wijde ende met andere deuote menschen besocht hadde theylich lant ende ander heylige steden, so sterff hi mit sommige anderen inden wege gode haer sielen beuelende, die welcke van sinte wijde weerdelijc begrauen werden Mer als here wonodulphus sieck worden was vander coortsen so gheuoelde hi bi in gheuen des heyiligen geests dat hi steruen soude, ende dat gaff hi sinte wyde te kennen, hem biddende als hi doot waer dat hi sinen vrienden draghen wilde eenen rinck die hi hem gaf tot eenen teken der waerheyt Ende na veel goddienstighe vermaningen soe sloech hi sijn oogen ende handen inden hemel ende offerde sijn syele inden handen der engelen. Ende want god thonen woude met wat eeren sijn vrient bi hem verheuen was inden hemel so geuielt dat drie croepelen op sijn graf haren rechten ganck cregen ende twee blinden werden siende

Mer niet alleen in sijn doot mer ooc in sijn leuen had hi van gode die gracie van miraculen, als van sijnen ackere die onbesayt sijnde veel corens voort brachte, ende noch andere.