templacien ende si sprac suetelic tot den coninc der glorien hem ootmoedelic biddende voor een haer geminde susterken die van herte gequelt was Doe antwoorde haer onse heere vraghende. Dochter wat begeerdi van mi Si seyde Heere heb ic gracie geuonden in dinen ogen so thoont mi een seeker teeken harer behoudenissen. Doen antwoorde haer onse here Sich ic thone di die gloriose plaetse der onsprekelijcker vruechden, die ick haer int eynde geuen sal sonder eynde. Doe was die maget christi seer verblijt, ende ten oczune van deser openbaringen so ontfincse ooc reuelatie van toecomende dingen, te weten vanden state van somige haren vrienden, den welcken geschiet was dat geen dat se inden geest bekende
Daer was een susterken van .xi. iaren noch scholier die een grote siecte hadt Totter welcker sinte Jde haer visiteerende seide Jc bid v mijn geminde suster dat ghi den .vij. nachte na v doot weder coemt tot mi ende mi dan bootscapt hoe dat met v is Si antwoorde Jc salt geerne doen, ist dat mi god gehinget Als dat kint gestoruen was so en quam si niet weder den .vij. nacht, mer den xxviij. nacht openbaerde si haer ende seide aldus Tot nv toe heb ic geweest in purgerende steden om dies wil dat ick gheuoet ben gheweest van nootruften die met onreynen gelde waren gecocht. Daer na vraechde si haer na hare vrienden, som leuende, som doot Doe antwoorde si. Vanden somigen die leuen sijn eenighe inden wech die totten ewigen leuen leyt ende sullen behouden werden Ander sijn in sorchlijcken state, ende tis te vresen datse wten eewigen leuen gesloten sullen werden Doe seide voort sinte Jde noch vragende Ic bid v segt mi oft mijn leuen gode behaget, ende hoe dat is tusschen hem ende tusschen mi. Daer op antwoorde dye geest met bliden ghelate Ach hoe wel hoe wel doe seide sint Jde Hoe lange sal ick leven in deser allinden Die geest antwoorde Jn dit jaer suldi reisen totten here Doe verschiet de geest wt haren ogen totter eewiger glorien
Nauwelijc .vi. maenden daer na so wert die heylige maget Christi seer sieck so datmen haer doot verwachte Doe wert daer ghemaect een grote clage van haer medesusteren wenende ende gode biddende dat hijse noch wilde ghesparen So en wilde die goedertieren here sijn deuote dienstmaechden niet langhe laten in tribulacien Want inden naesten nacht doe si alle wachten nae tverscheyden van sinte Jde Soe was daer een deuote suster geheten Sapiencia leggende bisonder in groter droefheit ende wenende, die welc van gode vertroost wert seggende haer aldus Ida mijn gheminde en sal nv niet steruen om dies wille dat ic met veel gebeden tranen ende suchten bedwongen ben hair leuen te verlingen Al ist nochtans dat ic een mijnre geminder cortelic gecondicht heb datse in dit iaer steruen soude Aldus genas sinte Jde vander siecten ende leefde noch .xiij. iaren tot veelder menschen stichticheyt
Als dan den termijn haers leuens naecte so sloechse god met eender groter siecten so datse gestadelic te bedde lach een iaer lanck verbeydende met vruechden den dach haers verscheydens. Ende opten .xi. dach van December so gaf si hair siel inden handen gods ende ontfinck den loon der glorien int iaer ons heren
Auteursrechtelijk beschermd