Dat .xiij. capitel Van sinte Beggen hertoghinne van Brabant. Ende van Angise haren man
HJer voor int .ix. capitel van Karlemanne is geseyt van Angise sinte Arnouts soone, marcgraue des heylich rijcx, hoe dat hi ghecomen is vanden coningen van vrancrike, de welc Anghijs troude sinte Begghen sinte Pippijns van Landen dochtere sinte Geertruyts suster, ende bi beyde harer vader tiden so gheschiede dit huwelick Ende also werde si hertoge ende hertoginne na die doot vanden voorscreuen Grimolt die sonder oor sterf, ende si regeerde dat lant wijsliken. Ende Angijs was ooc groot biden coninc van Vrancrijke
Op een tijt als hi ginc buten iagen so wert hi vermoort int iaer ons heeren vi.C.lxxxv. Te weten van eenen dye Godwijn heet, dien hi van iongen kinde wt minnen op gehouden hadde. Ende dit quade werck dede godwijn om dat hi meynde Beggen te crigen tot eenre huysurouwen, want hi van niet opgecomen was ende groot geworden bi haer. Maer sinte Begge ontvloot hem in Ardennen, daer si een clooster dede maken van .vij. kercken, nae die .vij. kercken van Rome, ende heet Anden leggende tusschen Ludick ende Hoeye, ende daer es si verheuen sanctinne, ende is een clooster van edelen ionffrouwen canonikerssen. Ende nv rust si te Colen in een nonnen clooster geheten sinte Marien twelck si van eerst ghefundeert ende ghemaect hadde
Van deser sinte Begghen seytmen dat die Baghijnen eerst haren name vercregen hebben, want si veel deuote vrouwen ende ionffrouwen bi haer hadde die gode ynnichlic dienden
Vanden voorscreuen hertoge Angijs so behielt dese heylighe vrouwe Begge een sone die ooc Pippijn heet als sijn oude vader
Van sinte Beggen daer alle die hertogen van Brabant tot nv toe af ghecomen sijn, ende ooc die coningen van Vrancrijcke also dye voorseyde lynie wtwijst, sijn dese veersen
Begga ducissa fuit genitrixque germinis huius
Que fuit Angiso felici federe iuncta
Auteursrechtelijk beschermd