Van Brabant die excellente cronike

¶ Dat .lvi. capitel. Van hertoge Jan Anthonis sone

IAn Anthonis soen en was maer xiij. iaren out doe zijn vader doot was Doe ontsagen hem dye iij. staten van brabant ende van limborch te hullen bi gebreke van manliker ouderen. ende si stelden hem eenen schonen staet van notabelen heren ende wijse mannen Daer na so wert gesproken om hem te huwen ende te ontfaen voor hertoge Ende si vonden by rade van geleerden datse hem wel mochten hullen ende dat hi ooc wel eet doen mocht de rechten vanden lande te houden Niet te min om meerder sekerheyt soude hi gelouen dat hi binnen drie iaren na dat hi xv. iaer out waer sinen eet weder om vernieuwen soude. Ende oft hi des niet en dede so souden dan alle sijn lieden in Brabant verlaten sijn van alsulcke huldinge, geloften ende eeden als si hem gedaen hadden Twelc altemael also geschiede ende hi wert ontfangen ende gehult te Louen, te bruessel, tot Antwerpen ende tot shertogenbossche ende so voort in dander steden

¶ Daer na quam van Turnout tot Bruessel vrou Elyzabeth hertoginne van lutzenborch, wijlen hertogen Anthonis

[fol. 161v]

gesellinne by hertoge Janne haren stiefsone. Daer sprac men van harer duwarien ende hertoge Jan presenteerde haer iaerlicx te bewisen vijf hondert cronen Ende haer wert eenen notabelen staet geset om te Bruessel oft elders in Brabant te wonen. Mer na een wijltijts wert si also bedacht datse van Bruessel track gestoort na lutzenborch, twelc den lande niet seer profitelic en was, want hare oom de roomsche coninc Segemont hem des ooc stoorde datse also slechtelic wt Brabant ghesonden was

¶ So sandt hertoge Jan aenden roomschen coninc Segemont te Ludic sijnde den here van Diest ende andere ambassaten presenterende den coninc van hem te leene tontfangen al tgheen dat hertoge Jan vanden keyserijke te leen houdende was, ende daer toe om manscap te doene was die here van Diest van hem gemachticht met brieuen. Ende als den coninc geliefde so soude hertoge Jan dat selue in persone vernieuwen Dit weigerde die coninc te doen ter tijt toe dat vrou Lijsbetten sijnre nichten voldaen waer.

¶ Corts hier na hoorde men tidinge dat die elect van Ludick hertoge Jan van beyeren hertogeJanne van brabant sinen neue benemende wilde die passagie als hi nae Tricht trecken wilde om al daer gehult te sijn Ende dit was alsmen seyde bider informatie vanden tresorier des elects ioncheer Jan van Moniow die seer gearbeyt had dat hertoge Jan van bourgondien des iongen hertogen sijns neuen momboor soude werden, twelc die drie staten geweygert hadden. Twelc den ioncheere van moniouwen niet en behaechde, want had hertoge Jan momboor geworden so soude dese ionchere van moniouwen alle dat regiment in sijn stede gehadt hebben

¶ Dit was die hertoge Jan van Bourgondien die in sijnder tijt ouer tmeer track met veel eedele ridderscaps wt vrancrijke, daer si grote victorie hadden op die heydenen Mer ten lesten bleuen si daer alle verslagen ende som gheuangen ende deerliken gemartelizeert, want die wreede turck en wildese niet laten stellen te rantsoene, ende lietse deen voor dander na moeder naect mit sweerden doorhouwen Onder welck hertoghe Jan midts sonderlinger auontueren ontquam, so datter een wijs man seer expert inder const van astronomien den soudaen riet dat hi hertoghe Jan te rantsoene stellen soude, want bi sinen geslachte in toecomende tiden noch veele kerstenen verslagen souden werden. Ende dus so ontquam die hertoge van Bourgondien Welcke prophecien ay lazen warachtich gheuiel, also hier na gheseyt sal werden

¶ Nv keer ick weder op hertoge Jan van beyeren die elect van Ludic was so beraden dat hi hertoge Jan van babant gene passagien verlenen en wilde. Als hertoge Jan dese tijdinge hoorde so vergaerde hi groot volc van ridderscape wt brabant ende passeerde also mit machte van volck door sijn lant daer hem beliefde na Tricht, daer hi gehult wert also dat behoorde doende den behoorlijken eet ende is weder thuys gekeert in Brabant. Ende dese huldinge is geschiet int iaer ons heren .M.CCCC. ende .xvij.