Commentaar op het Hooglied

X Hoe die boec gheheten is

DIt boec heuet die name ontfangen
In duutsche. sanghe der sanghen
Want bouen alle sanghe gaen
Der minnen sanghe die hier in staen
So wie wil desen sanc wel singhen
Moet twee sanghe sonderlinghen
Hebben te rechte ouer songhen
Dair dese sanc is wt ghespronghen
Die sonder gaet bi drien sanghe
Vten sonden ouerlanghe
Dair om salhi telken ganc
Singhen gode lof ende danc
¶ Ten eersten als hi is ontuaren
Vten sonden salhi twaren
Singhen dat moyses doe sanc
Doe hi liet pharaons dwanc
Ende mitten sinen egipten liet
Ende quam inder woestinen verdriet
So langhe als wi sijn in sonden
Sijn wi in egipten ghebonden
Ende wi mit rouwe ontulien
Ende biechte laet onse sonde sien
So moghe wi gode billic singhen
Ende lof ende danc hem ane bringhen
Dese sanc is ons beduut
Biden sanghe die ouerluut
Moyses sanc doe hi was comen
Ouer dat mere te sinen vromen
Wanderen sal hi noch hier naer
In die woestine die is zwaer //

[fol. B3ra]

 

// Die godheit wilde die menscheit truwen

 

Ende hem seluen dair an vernuwen

 

Inder menscheliker nature

 

Om dat si worde in minnen pure

5

Dair om gaf hi hair doe ghichte

 

Want hi alle dinc om hair stichte

 

Hi gaf al onder smenschen voet

 

Sine boden waren vroet

 

Dat waren die vadren patriarken

10

Die mit woorden ende mit werken

 

Gods wille altoes verkenden

 

Ten lesten doe hijt woude enden

 

Sende hi an hair sine propheten

 

Die der menscheit lieten weten

15

Dat gods sone an hair wilde comen

 

Ende truwense tharen vromen

 

Ende condighen hair in menigher wijs

 

Der hogher godheit groten prijs

 

Nochtan en conde die menscheit niet

20

Te gode hair so gheuoeghen yet

 

Dat si den gods sone mochte ontfaen

 

Ende gans in sire minne staen

 

Also sere was si verladen

 

Mit sonden ende mit quaden daden