Commentaar op het Hooglied

LXXXIX Een ander glose

Noch mogen wi merken al hier in
Der salicheit enen andren sin
Gods wijsheit entie wairheit lere
Of die werke van onsen here
Mach wel ene celle sijn
Dair men uut scept goeden wiin
Dat dat herte altoes verhueghet
Want in wijsheit leit alle dÜeghet
Die bruut wart uan gode gheleit
In wijsheit als in die wairheit
Bi gheloue ende bi werken
Beghint te proeuen ende te merken
Hoe alle dinc in sine nature
Ontfaen heeft macht ende figure
Ende hoet gheduren mach in wesen
Dit mach die bruut in wiisheit lesen
Des spreect si die coninc heeft mi
Gheleet in sine wiincelle vri
Ende heuet in mi mit goeder sate
Gheoirdiniert die caritate
Hier machmen proeuen ende merken
Die de wairheit ende gods werken
Drinket. ende wijsheit proeuet
Dat hi der hulpe gods behoeuet