Commentaar op het Hooglied

XCJ Wat men minnen sal

Drie dingen siin die men sal minnen
Salmen salichede ghewinnen
Dair dat herte in lopen sal
Mit begheerten ouer al
Mer die minne sal niet rusten
Sine sal lopen mit soeter lusten
Ende in enen dinge bliuen
Dair si uaste sal in becliuen
¶ Den eersten loop die minne beghint
Te gode dair si al in vint

[fol. W20rb]

 

Ghebruken ruste ende urede

 

Dair in salsi mit stadichede

 

Hair lopen enden ende bliuen dair

 

Mit ghenoechten sonder vair

15

¶ Den anderen ganc sal rechte minne

 

Nemen mit ghestaden sinne

 

Talre dinc die god gemaket

 

Heuet. ende wel siin gheraket

 

Hoe goet si siin. hoe scone hoe rike

20

Hoe uolmaect. hoe scadelike

 

Dair proeuet minne dat god dat al

 

Allene ghemaket sonder misual

 

Heuet: ende dair om salsi rusten

 

Allene in gode mit groter lusten

25

¶ Ten derde male loopt caritate

 

Mit wijsheit ende mit rechter sate

 

Ten euenkersten ende merket wale

 

Hoe die menscheit altemale

 

In enen bande is beloken

30

Der sonden die god heuet te broken

 

Ende alle daghe mit sine ghenade

 

Noch breket tot des duuels scade

 

Caritate merct ende besiet

 

Dat hier niet en is dan verdriet

35

Dair om en sal si ruste en ghene

 

Soeken dan in gode allene

 

Dus sal minne al omme lopen

 

Mer allene in gode hopen

 

Dus sal lopen rechte minne

40

Altoes mit ghestaden sinne

 

Si sal duren ende bliuen

 

Ende uaste in sinen loue becliuen

 

Dus wart caritate gheuoeghet

 

So datter bruut dair mede ghenoeghet

45

Des spreect si hi heuet mit sate

 

In mi gheuoecht die caritate