Chiromantie

Dits dierste capittel van deser scientie

¶ Nu so mach men sien vanden deelen vander hant. waer omme men moet weten dat de hant heeft vele partien. Maer in also vele alse deser scientie toe behort so ne heeft si maer iij partien principaeleke. die ierste es driehoec. ende dat ander es dat buten driehoec es in de palme tote den vingheren. ende de derde partie es de vingheren ende de dume. die ierste vinger naest den dume die heet index. ende die ander medius. ende die derde medicus. ende die vierde auricularius. Van desen vorseiden vingheren so heeft de dume ij articlen. ende elc vanden andren drie. Ende omme dat die palme vele partien heeft. daeromme die dese sciencie volgen of connen wille. hi zie daer op. ende daeromme es ierst te seggene van haren partien hoe dat de palme versceeden es bi linien.

¶ Nota Inde palme so siin .iiij. principael linien. die ene die es natuerlec ende groet die omme gaet alden dume. ende dese heet de linie vanden levene ende si es hoeft van den andren ende begint tusschen den vinger die men heet index ende den wortel vanden dume ende si endet in den wortel vander hant ten arme weert. Dander linie die es groot ende es middelst ende es die suchter vanden driehoecke ende begint ter selver stat daer de linie van den levene beghint. ende versceedt de palme rechte bider middelt. Die derde vanden driehoecke es minst principael ende minst blickende. ende es die linie die met den tween vorseiden linien maect enen driehoec. ende beghint in den wortel vander hant ten arme wert. ende dore gaet de suchter linie bi den ende al hangende. ende es somtijt oneffene ende niet achtervolgende. ende in meneghen

[p. 189]

handen en vint mense niet ¶ Maer nu verstaet hoe si alle heeten die principael linien siin omme die merre verstannisse vander hant. Die meeste die omme gaet den dume. die heet linie van den levene. Ende die middelste die beghint met der vorseider linien. die heet die suchter vanden driehoecke. die derde die heet fondament vanden driehoecke. ende es die daer achterst ghenoemt was. ¶ Die vierde heet die tafel linie. ende die es naturlijc ¶ Nu so machmen versceeden de partien vander hant biden vorseiden linien want dat binnen den driehoecke es. dat heet die holheit vander hant. Ende onder elken vinger es een bergheskiin dat heeft name vanden vinghere die daer boven staet alse de berch die steet onder den dume. die heet des dumen berch. ende also vanden andren vingheren. Maer die partie die staet onder den cleinen vinger ende endt in den wortel vander hant. die heet de slach vander hant. ende dese gaet tote der linien vanden fondamente. Ende die berch die steet besloten met der linien vanden levene onder den dume. heet sdumen berch. Ende also es die holheit vander hant besloten met den vier berghen van vier vingheren. ende metten berghe vanden dume. ende met den slaghe vander hant. Ende dat hier voren geseit es. dats omme die kennisse der tekene die noch te seggene siin.