Chiromantie

Dits tcapitel vanden fondamente vanden driehoeke

¶ Nu es te segghene vander derdere linie van den driehoecke die es geheeten fondament vanden driehoecke. dewelke men vint niet vele in handen maer somtijt. Bidies alsi es. dats meest in die outheit. om die pine vanden werken. Maer alse mense vint in die jongedaghe ende si dan sere blijct. So bewiset hitte ende subtilen sin. ende het bediedt oec dat een mensche heeft de condicien van enen colerijn dewelke lichtelec gram siin ende haestelec spreken, ende lichtelec minnen starke wine ende heete spisen. ¶ Eist oec dat de hande cleine ende sachte siin ende si dese linie niet ne heeft, dit .b. fleumen ende vercoutheit ende dat een mensche niet wel verteren en mach ¶ Ende eist dat dese, vors. linie blijct ende dat si wel gevest es ende effene ende ghecontinueert ende wel blickende ende breet gnouch ende van goeder varwen. dit .b. ghesontheit ende goede naturale dispositie ende bliscapen ende stoutheiden. Maer es dat sake dat si nauwe es ende niet achtervolgende van quader varwe. dit bediedt tcontrarie vanden vors. dingen.