Dits tcapitel vander tafel linien.
¶ Na dat ghesien es vanden drien principael linien Nu es te segghene vander vierdre. dewelke es gheheeten de tafellinie ¶ Als dese vorseide linie es diep gnouch ende achtervolghende ende eenvoudech lanc gnouch vander linghede dat de suchter linie es ende wel ghevarwet. dit bediet goede naturale complexie ende warachtecheit ende goeden buuc ende goede blase. ende het .be. oec goede manlec lede kindre met te winnene. Ende het .be. oec in een wijf gherechtecheit ende ghetempertheit ¶ Eist oec dat sake dat si comt ten ende van der palme wert ten iersten vinghere alse hier in dese [in de marge getekende] hant. dit .be. quaetheit ende gramscap ¶ Eist oec dat si comt ane de linie vanden levene ende met hare maect enen hoec. dit .b. fingeringhe. So dat hi hem procureert doegcht ende ere sire fingeringhen. ende in eens menschen ieghenwordecheit sprect hi scone wort ende achter heme so verraethine ¶ Ende eist dat si gheet te iersten vingere weert al climmende. also vele te meer alsi climt also vele te meer eren betekent si. Maer gheet si ten iersten vingere wert sonder climmen. So .be. tcontrarie van hier vors. ¶ Ende es dat dese linie sprietende es boven. dit .b. dat een mensche swighende es ende van goeder conscientie. Maer alsi te vele climt dit .b. pine. ¶ Als dese linie es groet breet ende wel ghevarwet. dit bediedt. dat een man machtech es in sine manlecheit ¶ Ende als si es diepe ende rooet ende si vele linien boven heeft ende beneden. die volghet vele der luxurie of hi heeft vele neighens tote hare. ¶ Het es te wetene dat de tekene in eens wives hant ne siin niet so blickende als in eens mans hant. overmids de cranke ende de cleine varwe die in hare siin ende daer bi. min tekenen moeten ghenoegen in der wiven hande. dan in der mannen. Ende daer omme een man die heeft cleine subtile handekine ende vele bleek linien. dit es een wivech man. die ghebrect in het naturleker hitte ende in de naturleke doegcht. Omme dewelke dingen hi es nidech verradere. vol van worden ende oec begherende elke te iuierne ende en es niet goet met hem te wone. Ende tghelike es vanden wiven.
Auteursrechtelijk beschermd