Der fielen, rabauwen, oft der schalcken vocabulaer

Vanden Kammesieren.

DAt seste capittel is vanden Kammesieren. Dese zijn bedeleers als ionge scho-

[fol. B2v]

lieren ende ionge







studenten, dye vader ende moeder niet en volgen, ende haer meesteren niet gehoorsaemen willen zijn ende apostateren, ende comen onder quaet geselschap, die ooc in die wandelschap ende in dier rabauwerien geleert zijn. Ende die boeuen leeren haer dan spelen ende dobbelen, ende haer goeyken versetten ende vercoopen. Ende als sy niet meer en hebben soo leeren sy bedelen oft kammesieren.

Item dan comen sy van Roomen wt den sonnebosch, ende willen priester worden aenden dolman oft aen die greyse. Item die eene van haer is een accolythus. Die ander is een episteleer. Die derde een euangelier, ende die vierde een priestere. Ende si en hebben niemant dan vrome ende eerbare lieden die haer helpen met hare aelmoessen, want haer vrienden zijn haer af gestoruen, gelijck si seggen. Item si heysschen vlasch tot eenen choorcleedt. Mer het is tot eender kibiger dille, tot eenen lijms oft hooft standen, dat is eender hoere tot eenen doecke. Item ghelt dat si tot eender ander quatertemper tijt ghewijt oft gheconsacreert moghen worden in een sonnenbosch. Ende al dat si also bedelen, dat verspelen ende verboelen si. Item

[fol. B3r]

sommige van dese scheeren cruynen ende en zijn niet geordineert. Ende sommighe hebben breuieren ende boecken gelijc oft si priesters waren. Ende dit ghebuert sonderlinghe op alder sielen dach. Ende sommighe van dese zijn soo onuersaecht dat si haer niet en schamen den volcke wijs te maeken dat sy misse doen. Ende maecken den volcke wijs dat si God consacreren, nochtans en hebben si die macht niet. Ende alle dese zijn een loos valsch geselschap. Conclusio. Dese kammesieren en gheeft niet, so laten sy haestelijc haer bedelen. Ende sommige van dese hebben ooc valsche besegelde brieuen, dat alsoo is, nochtans ist al versiert ende valschelijck ghelogen.