De gheestelycke vryagie

[p. 289]

Hier heet de Bruydt haeren Bruydegom hertelijcke willecom.

VVillecom Iesus mijn Heere mijn Godt,
Willecomme in mijns herten slot,
Ick heete v willecomme 'tuwen huyse,
Weeret van my der sonden ruyse,
Doeghet al vlieghen, en zijn 'tuwen dienste,
Datter is in my, soo wel 'tmeeste als 'tminste.
Stelt nae uwen wille sin ende handt,
Mijn memorie, wille, en verstandt.
Schicket en voeghet al totter deucht,
Op dat ghy in my moght hebben vreucht.
Maeckt my nae v hert' een mensche,
Soo dat ghy my crijght 'tuwen wensche,
Blijft by my, en alst sal auondt werden,
En laet my gheensins in sonden terden.
Ick gheue v mijn herte, en mijnen wille,
En laet tusschen ons niet zijn gheschille,
Deur v aldersaelichste presentie,
Beweeght mijn herte tot penitentie,
Gheneest mijn ziele v lieue Bruydt,
Deur v Goddelijcke cracht, en virtuyt,
Verciertse oock met v properheydt,
Der deuchden inder eeuwicheydt.

FINIS.