De Gulden Passer. Jaargang 58-59

80. Waer mede de ghemeyne weluaert best onderhouden wort.

Ten is niet genoech datmen heeft eens Conincs name
Met de wapenen, croon, en scepter triumphant,
Om de ghemeynte te regeren sonder blame:
Maer daer toe behoort noch sulcke const en verstant,
Diemen eylaes nu niet en vint aen elcken cant,
Dats dat hy sijn borgers als een vader beminne
En goede statuyten behoude in sijn lant,
En de wetten die hy ghestelt heeft inne
Also selfs onderhoude dat elck bekinne,
Bescermende d'onnoosel', en straffende t'quaet.
Sijnen vyanden sal hy met cloecken sinne
Wederstaen, en sijn ondersaten vroech en laet
Beschudden: om welck te doen metter daet
So moet hy nemen dat hem van noot is.
Dat doende nochtans altijt met wijsen raet,
Want dat is d'Imperie dat van ghelde bloot is.
Voor al sal hy onderhouden (dwelc punt seer groot is)
Den oprechten Godsdienst voor mannen en vrouwen,
Sijnde liberael, want sulc by elcken minioot is:
En recht doende, sal hy alle rigeur schouwen.
D'officieren sullen hen so in als houwen
Datse mogen gheacht worden weert dier eeren,
Dat leyt niet ins weten, maer int doen sonder flouwen
Daer door sullen sy en hen volck in peys vermeeren.