De Gulden Passer. Jaargang 58-59

[p. 63]

⁺ Plus quàm Diomedis & Glauci permutatio.
Ad Paschasium Hamelium.

+ 28, 29.

14.

Nvper Astrologus satis peritus
Iussus nomine Principis videre
Caelum, mox pluuias fore, ac tonitru
Dixit, sic remoratus est volentem
Venatum proficiscier iuuentam.
Sed cùm nec pluuiae, minùs tonitru
Venisset, properant foras subinde,
Mendacemq́ue adeò increpant magistrum.
Princeps in reditu videns arantem
Qui rastis minuebat, & cylindro
Glebas, num pluuias breui futuras
Putaret, rogat: ille mox petenti:
Viginti nihil his ait diebus.
Euentus quoque dicta comprobauit.
Princeps Astrologi sui cylindros
Instrumentaq́ue, queis solebat astra
Metiri rapit, & dedit ferenda
Vati ruricolae domum: iubetq́ue
Vicissim istius hic ferat cylindrum
Pro astris, rastraq́ue sedulò colenda.