De Gulden Passer. Jaargang 60

[p. 51]

87. In sponsalia Ioannis Abij Angli, & Albae Rolleae D. Arnoldi Medici Gandauensis filiae.

C'est donques à ceste fois

O gentille race Angloise
Que l'amitie' tu reçois
De ceste vierge Gantoise:
Tu sceus flechir la beaute'
D'une excellente pucelle,
A fin que Iunon la belle
Ioingnist vostre fermete'.

I'en reçois si grand plaisir

Qu'ores de bon coeur ie prie
Que vostre amoureux desir
Augmente tout' vostre vie:
Qu'il demeure permanent,
Tant qu'une fin bien-heureuse
Dans vne main gracieuse
Vous emporte au firmament.

Ie te prie aussi, Seigneur,

De m'exaucer la priere,
Faisant luire la grandeur
De ta diuine lumiere,
En confirmant leur amour,
Et bien-heurant par la grace
Et eux & toute leur race
Tout iusques au dernier iour.

Sus donques, qu'ils soyent liez

Par un heureux mariage,
Qu'il sorte des mariez
Vn legitime lignage:
Assiste à ce sainct accord,
Hymen, que tant on desire:
Qu'on oye sonner' la lire
Et du lut le son d'acort.
Et toy, Arnould, sois heureux,
En receuant vn tel gendre,
Priant le plus cler des dieux
Qu'à ta fille il veuille entendre:
Que la prudence & la foy.
Et chaste amour les contienne,
Qu'honneur aussi les maintienne
Dessoubz vne mesme loy.

Si ores qu'il est hyuer

Et que la terre est reclose
Les fleus on pouuoit trouuer,
Ny le Myrthe, ny la rose,
Ny le verdoyant laurier,
Ne manqueroyent à la voye:
Seulement ie vous enuoye
Ce que ie puis enuoyer.