De Gulden Passer. Jaargang 60

93. Temporis iactura:
Ad pilulam.

Petit oesteuf, que te sert de tromper

Les ieunes gens qui te suyuent sans cesse?
Leur donne-tu ou la force ou l'addresse,
Ou vn present dont ils puissent vser?

Encependant que d'un bras roidement

Tu es poussé auecque la raquette,
Fuis-tu dehors la place qu'on a faicte,
De ta vertu vsant tant seulement?

Auec plaisir on te prend en la main,

Estant trouué ou te repousse encore:
Tu vas & viens or' d'vu costé, & ore
Tu t'en reuas par le mesme chemin.
Tu n'as point craint promettre guarison
A vn malade au danger de sa vie:
Et toutesfois tu donnes maladie
A l'homme sain luy gastant la raison.

Tu pers l'argent, tu prens triumphamment

L'honneur d'autruy, à toy fable & friuole,
Et le neant d'vne feincte parole
Par vn bon droict t'appertient seulement.

Ainsi iadis le droict ne fut donné

Au ieu de palme, ainsi tu n'auois garde,
O tripotier, d'auoir ta main pillarde
Plaine de gaing par abus ordonne'.

Ren doncq le temps à ceux qui l'ont perdu

En regardant de moindrir la despence.
Du bien iamais tu n'ayes iouissance
D'estre porte' dedans l'air estendu.