De Gulden Passer. Jaargang 60

122. Voluptatis triumphus.

Ce chariot tiré par deux cheuaux domptez,

Ceste tourbe qui est compagne aux voluptez
Monstrant quelles ell' sont, & quelle est leur nature.
L'vne est douce, & l'autre est meschante outre mesure,
A gauche nous voyons l'orgueil de ceste cy,
A droit nous pouuons voir la gentillesse aussi
Qui nous est par la main de l'autre presentee:
Qui par vn cheual blanc est subit emportee,
Et l'autre par vn noir ayant pour compagnon
Le vin & la douleur & le mortel poison
De Venus pour suyuie auec la repentance.
D'vn enfant aueuglé va conduisant en dance:
Mais ceux qui sont aupres de chaste volupté
Sont es vertus, la gloire auec l'honnesteté,
Le bien public, l'honneur qui conduist & qui guide
Ainsi qu'vn bon chartier vn cheual par la bride.
Toy qui veux estre sage il faut chasser tousiours
La gauche volupté dont les plaisirs sont cours,
Et prendre celle-la qui nous voyons à dextre,
Et ainsi tu feras tes vertus apparoistre.