De Gulden Passer. Jaargang 60
(1982)– [tijdschrift] Gulden Passer, De–
Auteursrechtelijk beschermd
[pagina 98]
| |
140.
qvis situs hac vrna? Vates, medicusq́ue salubris
Lotichius, nomen cuius in orbe viget.
Nemo hunc Stigelio celebri, cultoq́ue Sabino
Posthabuit, poterat quos superare breui.
Qui fluuij cessant, quid olor, tristesúe puellae?
Quid circum lauri, quid medioq́ue senex?
Gallia, Pierides, Germania, Tybridis vndae,
Hunc Phoebo & defles nate, siletq́ue melos.
Arcus quid pluuius superest? Hoc foedus amicum
Vesteq́ue res hominum versicolore notat,
Sollicitos iuuenis bello, Musisq́ue labores
Hîc peregrè, casus sustinuitq́ue graues.
Post vbi sedatam patriam, mitesq́ue sorores
Aonidum sensit, dat Medicina locum.
Quid tellus, mare, caelum, aër, quid lucidus ignis
Continet, hunc meritò quod latuisse putes?
Occidit heu properè: at vitam monumenta coaeuam
Authori reddunt, posteritasq́ue memor.
Haec doctus lauro cineres tege, care viator:
Dicq́ue vale, iunget nos rediuiua cohors.
 |
|
