Herbarijs

¶ Nigella. Nenufar. Nausturcium

[125]

NIgella of nigle. wast int coren ende es heet ende droge in den .3. graet Ende dit saet hout men wel .X. jaer goet ¶ Jegen die worme in den buuc salmen maken .1. plaester daer nigella in getempert es met sape van alsenen. ende men saelt hen leggen optie mage ende opten navel. ende sonderlinge kinderen. Maer ouden lieden salment geven met zeeme. Het droecht oec vloyende humoren maer dies vele nutte souder omme moeten sterven

[p. 379]

[126]

NEnufar of caliinbloemen of aplompen. dat siin tremeer bloemen ende staen in watere. Ende siin cout ende wac in den .3. graet. ende die witte dat siin die beste. entie gelue en siin niet so goet Ende men sal de bloemen drogen so mach mense .2. jaer goet houden. Ende men maect der af cyroop den genen die liggen in die sucht. Entie sarasine leggense des avonts in watere. Ende smorgens drinken si dwater jegen die hitte van dien lande. Ende men maecter oec water af also als men van rosen doet

[p. 380]

[127]

NAusturcium dats kersse. ende es van .2. manieren. wit ende root. ende beide siin si heet ende droge in den .4. graet. Ende tsaet gaet in medicinen Ende men maecht goet houden .5. jaer Ende tgroene cruut heeft groete cracht te verteerne die humoren ¶ Tsaet gesoden in wine ende gedronken. es goet iegen die geelsucht ¶ Ende tcruut geeten geneest bijtsel in die mage ende geneest puusten

[p. 382]