De historia van den souen wysen meisteren

Hir kumpt de keiserinne ouer to deme keyser vnde deyt gantz ouel.

DO nu de keyserynne horde, dat de keyser synen sone den dach wolde lathen leuen. Do hoff sick ouer ene grote noet van eer Do sprack de keyser, vrouwe een keyser schal vnde moet vele horen, eer he dat vullenbrynget. In ener tijt so suet men vele dynghes wedder goth, vnde de gherechtycheyt. De keyserynne sprack, Ik wyl iuw verwaer seggen. Iw gheschut myt den meren, de gy van iuwen bosen sones meysteren also gerne horen als octauiano deme keyser gheschach myt deme golde, darumme dat he also seer was ghesturt vpp dat gholt. De keyser sprack, Segge my wo gheschach deme. Se sprack. Octauianus de keyser de dar gheweldych was, de hadde gold vor alle dynck so leeff dat he gades vnde syner eghenen eere vergath. In der tijt deden de Romere anderen landen so vele leydes vnde gewalt, dat sik mannich konynckrike wedder se sette, vnde en ock vele leydes deden. In den tijden was to Rome de meyster virgilius, de was der besten meystere een vth der swarten kunst. Do he nu dar bynnen was. do beeden de romere, dat he ichtes wat make dorch dat se ghewarnet worden vor eren vyanden. Do heth he se enen torn maken, vnde makede een bylde mydden vp den torne, dat bylde hadde enen appel in der hand, vmme dat bylde makede he vele andere bylde, de segen in alle lant, vnde yslick bylde ene klocke in der hant, welk lant syk wolde vp-

[fol. 19v]

werpen yegen de romere, vnde wedder se sin, so ludde dat sulue bylde to deme eersten dat yegen dem lande stunt. dar na de anderen alle. Dar meede worden de romere alle wege ghewarnet, vnde voren dan in dat sulue lant, vnde makeden se en wedder vnderdanych vnde horsam. Dar na makede meyster virgilius to rome, tho troste armer lude een lycht, dat brande stedichlyken vnde makede enen vletende borne dar de armen lude to drinkende vunden, vnde ok dar badeden. to twen makede he een bylde, vnde schreff em an de sterne. We my sleyt, tohant so weerde ik ghewraken. Dat bylde stunt mannich iar, vnde was armer lude trost. Do quam daer eens een pape. do he dat lassz, do sloch he yd an den hals, do verlosch dat vur, vnde de borne vergynck. De armen lude weren eres trostes berouet, vnde schryeden mort ouer den papen. Dar na quemen dre konynge to samene. den was veele leydes ghescheen van den romeren, vnde worden myt een ander to rade, wo se gewraken mochten werden, vnde de ene meende yd mochte nicht gesyn, de wyle de bylde vp dem torne weren, wente de romere worden alle weghe ghewarnet dorch se. Do stunden dar by dre wol ghemode riddere, de wusten wol dat de keyser golt leeff hadde bauen alle dynck vnde spreken to den konyngen. Wat wylle gy vns gheuen, dat wy den torne verstoren. Se laueden en vele goldes vnde suluers.