De historia van den souen wysen meisteren

wo de keiser Leo makede eenen tempel vnde dar inne makede he dre bilde dat eene hadde de hand vor sik gestrecket vnde auer den vinger een gulden vingerlin dat ander hadde een gulden kleet dat drudde hadde enen ghulden barth.

LEo de keyser do de regneerde, vnde vor alle dynk so hadde he schone Iuncvrouwen leeff vnde sach se gerne, Dar vmme het he enen tempel maken vnde dre bylde dar in, vnde boeth in alle synen ryke dat se de bylde mosten an beeden, dat eerste bylde hadde de handt van sik gestrecket tegen dat volk, vnde hadde an eenen

[fol. 49v]

vinger een gulden vingerlin dar was an gescreuen, yk byn wol gebaren nim war des vyngherlins. Dat ander bylde hadde enen gulden barth, daer was an gescreuen, Ik byn gebart we kael sy de kame to my vnde neme mynes hares. Dat drudde bylde hadde een gulden cleet vnde was vmme dat herte van purperen daer ane was ghescreuen, Ik byn de nemant vruchtet. De dre bylde weren inwendich van stenen vullenbracht. De keyser Leo sette se in den tempel, vnde dede een gesette de den bylden neme dat vingerlin den bart edder dat kleet de moste steruen eenes vnerliken dodes. Id geschach dat een kremer in den tempel quam, vnde do he sach dat eerste bylde dat de hand myt dem guldene vingerlin van syk gestrecket hadde. He nam dat vyngerlin vnde gynk to deme anderen bylde, vnde nam em den gulden barth. Dar na gynck he to deme drudden bylde vnde nam em ok dat gulden cleet, vnde also berouede he se alle dre. Do nu dat volk de bylden segen berouet drade deden see yd deme keyser kund. Do de keyser dat vernam he ward bedrouet, vnde de dat hadde ghedaen den leet he vor syk bryngen vnde straffede ene daer vmme, he hadde de bylde wedder syn gheboth berouet. He sprak here dar to antworde ik. Ik quam in den tempel, do hadde dat eene bylde mit den vingerlyn syne hand van em gestrecket, do ghedachte ik, ik scolde yd nemen doch so en hadde ik des nicht genamen, do yk de scryfft sach. yk byn wol gebaren nim war des vyngherlinges, do ghedachte yk men gan yd dy wol vnde nam yd, vnde ghetruwe dat yk dar nycht vngetruwe vnrecht an ghedaen en hebbe Dar na quam yk to deme anderen bylde dat hadde eenen gulden bart, do gedachte ik des vader gewan

[fol. 50r]

ny sulken bart schal nu de sone bauen den vader syn, dat en is nycht temelick vnde were wol na bescheydenheyt dat du em den barth nemest, doch dar vmme so en hadde ick des nycht ghedaen denne do ik de schryfft lassz an der sterne, de sprak ik byn gebart we kael sy de kame to my vnde neme mynes hares Do nam yk den baert wente also ghy seen so byn ik kael. Daer na quam yk tho deme drudden bylde dat een gulden kleet an hadde, do ghedachte yk dat bilde ys van eenen steene vnde de ys van natur kolt so is golt ock kolt van naturen weghen do ghedachte yk wat schal kolt to kolde doen, were yd ok in deme samere so were dat kleet deme bylde to swaer edder wo em sy ik en hadde yd doch nycht genamen, men do yck lassz de schryfft de dat bylde an deme herten hadde staen. Ik byn de nemant en vruchtet, do ghedachte ik wat schal de houerdige rede vnde also hebbe yk yd ok berouet. Do sprak de keyser to deme kremer de gesette weren gemaket also dat de bylde nemant scholde berouen wente du dy hest an genamen dat dy nycht to en hort noch dy nicht an en geet hijr van so gheue yk dat ordel auer dy dat men dy schal banghen.

DEsse Keyser is gewest vnse leue here ihesus crystus de de reynicheyt leeff hefft vor allen dynghen, de hefft dre bilde in desser werlt de em wol geuallen. Dat eerste bylde dat syn hant hefft van em gestrecket dat synd de oedmodighen desser werlt, Wat de willen schaffen vor den gheweldighen so moten se de hand strecken myt deme gheuende, wente de ghaue vorblyndet de wijsheyt vnde yd ys doch wedder den almechtygen

[fol. 50v]

god drade spreeken se he gaff yd vns willichlyken scholde wy es nycht nemen. Dat ander bylde, dat sint de ryken dusser werlt den de almechtige got besundergen genade vorlenet hefft. daer vmme dat se de werke der barmherticheyt vervullen. drade so spreket men en vmme gunst, syn vader ghewan ny so veel he was vor korten tijden arm, so begheert mannych des anderen gud de neen recht dar tot en hefft. By deme drudden bylde is vns gegeuen to verstande de geweldygen desser werlt, de dat gemeene guet arm vnde ryke schollen beschermen, dar wedder de prelaten der hilligen cristenheyt vake kyuen vnde nemen dat se nycht nemen schollen, vnde verschuldighen syk dar inne gantz sere, wente he is salich de gerecht vnde rechticheyt de yt alle tijd we deme nycht wyl gehorsam syn de steruet belick eenes quaden dodes, wente were neen ordel in dusser werlt vnde gherichte so mochte neemant bestaen, Gerechticheyt is een dogent de yderman gyft des se is