De historia van den souen wysen meisteren

Hir kempen se vnde sunderliken twe riddere de ene hadde iij guldene appele in deme schilde vnde de wan den seghe:

ADamas dede regneerde, He hadde sunderlyken leeff torneyen, vnde dede eens een groten hoff, We syk daer aller beste helt de ward van em erlyck begauet. Do dat de riddere vnde knechte hadden vernamen. do quam erer dar een groet menninge van ridderen vnde beschickeden een deel an ene ander syde, vnde dat eerste del het he eer wapen alle leggen an eene side an welk wapen ward gheroret van den anderen de mosten kempen, vnde den suluen den dat wapen was den kleedede ene Iuncvrouwe vnde moste myt em vechten. Des was daer een rydder de beschouwede daer alle de wapene vnde he besach sunderlyken

[fol. 52v]

eenen schylt dar weren dre gulden appele ane, Des begerde de ridder vor de anderen alle, vnde rorde ene myt synen spere an, Do de des gewar ward des dat wapen was drade sande he na ener reynen iuncvruwen vnde wapende syk vnde vochte manliken myt em, vnde ghewan den seghe vnde sloch em dat houet aff vnde vntfynk dat loen na des konynges gelouede

DEsse keyser is vnse here Ihesus Cristus de heft dat wapen gelecht in des minschen sele God de vader syne ghewalt vth deme de minsche was here auer alle creaturen God de sone syne wysheyt vth deme de minsche kunst hadde aller dynghe. God de hillige geest leue vnde gude yegen god vnde yegen deme euenen mynschen. Dussen schylt hefft de duuel an gheroret, do hee Adame vthe deme paradijse verwysede vnde moste gades sone van noet eener reynen iuncvruwen ghekledet werden myt der mynscheyt, in deme cleede so hefft he an ghevochten den duuel an deme stamme des hillighen Cruces vnde hefft en vth syner ghewalt ghestoten offte syk de mynsche anders suluen helpen wyl