Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens

[fol. *2r]

Tot den Godtvruchtighen Sanger ofte Leser.

Alsoo ick beuinde beminde Vrienden, Dat dan veel verscheyden Leysen ende geestelyckeren Liedekens ghedruckt zyn, ende seer confuseluck vermengt, met andere onbehoorlycke Liedekens, soo hebbe ick niet moghen naelaten, om myn broederen te gherieuen, te vergaderen sommighe Leysen, Himni ende Liedekens, vvaer by ick ghenoecht hebbe sommighe Refereynen, tot dien Liedekens Dienende, alsoo den Sangher ofte Leser vvel sal beuinden, om op die grote feest-dagen (ende voorts door den Jare) te ghebruycken, om ons seluen alsdan, principalyck, vvederom met Danckbaerheyt te verhueghen, in den Geest, als vvy ghedachtenis houdende zyn, met die ghemeyne Christenheyt, Die vvonderlycke mensch-vvordinghe ende besnydenisse des Heeren, ende den Offerhanden der Wyser Coningen, mitsgaders die heerlycke Verrysenis ende opuaert ten Hemel, ende die nedersendinghen des H. Geeste op den Pincxsterdach, ende daerenbouen, die hoghe feest-dach van ‘tlichaem ons Heeren, op den H. Sacramentsdach ons ingestelt. Biddende Godt

[fol. *2v]

almachtich ons in te storten zyn Goddelycke gratie, om die feest-daghen, ende dee Liedekens ende Refereynen te ghebruycken tot zynder eeren, ende onser Sielen salicheyt, ende als. alle dinghen van Godt goet gemaeckt zyn, nochtans misbruyckt mogen vverden, van aertschen menschen, die doch nimmermeer versaet en syn, en sal dese Liedekens noch Refereynen oock geen vermakinghen vvesen, maer ick hoope, Dat het den goeden eenighe versaetheyt ende vermaeck sal zyn, vvant versaetheyt ende vollicheyt, is alleen in Godt te vinden, als ons Den Propheet Dauid seyt, ick sal versaet vverden, als u glorie haer veropenbaert. Also beminde hope ick, tghene hier in dit Boecxken vergadert is, dat het vvesen sal tot een aenlockinghe der deucht, om alle ydelheyt des Werelts te laten, ende syn seluen met geestelucken saken te becommeren, vvaer tot ick dit Boecxken vergadert hebbe, andervverf Godt biddende, ons een opgheheuven harte tot hem te verleenen, int singen ofte lesen. Biddende myn ten besten te houden, tghene niet ghedaen en is alst vvel behoorden.

Vaert vvel.

Singt en leeft met verstant.

Spes mea Deus.