Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens

(1605)–Anoniem Leysen-boeck der catholijcken– rechtenstatus


Refereyn. Al der excellentste, wijste, goetgrondichste Die Gods moghende hant oyt schiep op eerde Aylacen hoe soude ic alder sondichste
[pagina 74]
V derren loven schoonste soetmondichste Vreese trect my af, aenmerckende u weerde Maer want ick wter herten oyt begeerde V lof te vermeeren, nae mijn wterste macht Doet hope dat ick dwerck noch aenveerde Verwerft my doch gratie, dat ict volheerde Ick betrouwe in u hulpe, niet in mijn cracht O vrouwe daer deewighe vruecht door lacht Ende helle door weent, om de glorie Die de mensche heeft vercregen, door u soete dracht Salich is den buyt die u heeft voortgebracht Die inde eeuwicheyt in Gods consistorie Waert voorsien om te wesen Soons cyborie Dwelck oock geschiede, ten bequamen tijde Lof Tempel die d’opperste Bisschop wyde. Lof tempel vanden wijsten werckman alleene Ghetimmert, te rechte gecompareert By Salomons tempel, van Marmoren steene Van buyten gemaect, en van binnen reene Metten goude der liefden, wel gestoffeert Lof Tempel op eenen vasten steen ghefundeert Lof sancta sanctorum, lof heylige stede Daer de Arcke Gods in was gelogeert Lof gouden outaer wel geordineert Daer dopperste priester, offerhande op dede Lof stoel der genaden, die ons verwerft vrede Daer Cherubins vlogels, over waren gereet Beseliels Arcke seer suyver van snede Lof purpuren gardijne waer dat oock mede Het heylich der heyligen wert bedect Lof sanctuarie, met Cedren ghestrect V seggende ter eeren, ick dit belijde Lof Tempel die d’opperste Bisschop wyde. Lof Tempel in thoochste Ierusalem gestaen
[pagina 75]
Weerdiger dan Salomons Tempel gebleken Want dien hebben de heydenen te niet gedaen Maria uwen Tempel, en is noyt vergaen Sijnde met salvingen s’heylichs geests bestreken Lof Tempel op wiens outaer onbesweken Men sonder ophouden vier moest stoken Waer af dat Wieroock wert ontstoken En costelijck cruyt, wter Apoteken d’Welck de Coninck heeft in zijn ruste gheroken Lof Tempel vanden Propheten, voorsproken Lof schatcamer waer inne tonser leeren Het wet-boec bewaert wert, sonder croken Lof gulden panne daermen inne sach koken d’Edelste rocxken, dwelc den Heere der Heeren Gheoffert wert, o vrouwe tot uwer eeren Roepe ick noch eens met herten blyde Lof Tempel die dopperste, Bisschop wijde. Lof costelijc ghesticht, seer wel bewaert Met stercke poorten, ende hooge mueren Daer de oogen der heeren, op sien ongespaert En de heerlijckheyt Gods, in is geopenbaert Ghelijc in Salomons Tempel, in figueren Maer u glorie, sal eewelijc dueren O maechdelijck Tempel al omme beset Met stercken doorwachters die schilden vueren Dat geen vyanden u aen en mogen rueren Lof Tempel van Antiocho noyt besmet Lof Tempel waer inne stonden nae de wet Thien gouden candelaers, met haren lichte Dat zijn u thien duechden, ons lichtende net Lof Ezechiels poorte, lof weerdich wincket Oostwaert staende, gesloten dichte Aensiende u weerde reyn Davids nichte Ick my te seggen niet en vermijde
[pagina 76]
Lof Tempel die d’opperste Bisschop wijde. De wijsheyt heeft haer selven een huys geschepen Dat zijt ghy Maria inder eewicheyt voorsien Dat ghy in uwen Tempel, sout onvernepen Sluyten dien de hemelen noyt en begrepen Tis recht dat wy eertwormen u eere bien O ons hope, ons leven, o Tempel tot wien Ons toevlucht is, in alle tribulatie Plaecht God de werelt, om de sonden die geschien Met oorloge, dier tijt en wy mitsdien V Tempel versoecken door contemplatie En bidden Godt door u, ghy crijcht ons gratie Coninginne des hemels, Vrouwe der vrouwen Ist dat ons bestrijt, des vyants tentatie Ia soo seere dat ons naect desperatie Vlien wy tot desen Tempel met vol betrouwen En bidden Godt door u wy zijn behouwen Seggende hoe seere, die vyant benijde Lof Tempel die d’opperste Bisschop wijde. Al is Godt de Heere, oock op ons gestoort Door onse misdaet, o vrouwe gheduchtich Roepen wy om hulpe, tot u rechtvoort Ghy bidt Godt voor ons, en u bede wert verhoort Sijn wy belast, beswaert, sieck oft suchtich Oft worden wy voor ons vyanden vluchtich Oft sluyt Godt den Hemel door ons sondich sneven Bidden wy tot u, o Tempel doorluchtich Wy werden gesont, het aertrijck wert vuchtich Door regen, op dattet ons voetsel mach gheven En alle ons vyanden, werden verdreven Want u kint en mach nae schriftuerlijck betuygen V geen dinck weygeren, o Tempel verheven Daer de helsche geesten, wt vreesen voor beven En de Engelen wt liefden de knien voor buygen
[pagina 77]
O maechdelijck moeder die Christus wou suygen Wy kinderen van Eva roepen te strijde Lof Tempel die d’opperste Bisschop wijde. Lof die alle staten, geeft goet exempel Door u reyn suyver stichtige manieren Ghy zijt heel schoone sonder vlecke, oft rempel Dies dagelijcx voor u weerdigen Gods tempel Staen meer dan ses duysent officieren In de vierentwintich ouders metten vier dieren Loven u naest Godt door u kints bevelen Worpen sy haer croonen, vrouwe goedertieren Voor uwen stoel, u oock feestelijck vieren Veel duysent sangers die met luyder kelen V lof sanc singen, de Herpspeelders spelen Tot uwen love, d’alder soetste musijcke En al themelsche heyr, niet om verelen Looft u ende eewelijck loven selen So lange als Godt is int hemelsche rijcke Dus roep ic ooc arm mensch, gemaect van slijcke Tot u O hoochste gebenedijde Lof Tempel die d’opperste Bisschop wijde. Prince. Lof Princelijc hof, Coninclijcke camere Daer de Prince der Princen, wt den throone In daelde, vindende geen stadt bequamere Onder de vrouwen noyt aengenamere Godt den Vadere, dan ghy alderschoonste schoone Dies d’eeuwich woort, in u weerdighe persoone Vleesch wert, van u alderpuerste bloet Dus ist recht dat ic u int herte croone En dat ic mijn ionste int werck ooc thoone Want door u tot ons vloeyt, der genaden vloet Ghy hebt Godt getogen door u ootmoet Dat hy niet langer en wilde, beyen
[pagina 78]
Mensche te worden, O Abigail vroet Ick bidde u my voor Davids toren behoet En als mijn ziele naer van hier moet scheyen So wiltse door uwe bystant geleyen Dat t’zweert der rechtveerdicheyt haer niet en snijde Lof Tempel die d’opperste, Bisschop wijde

Vorige Volgende

Refereyn.