Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens

(1605)–Anoniem Leysen-boeck der catholijcken– rechtenstatus


Refereyn. Laet ons den Heere nu vrolijc singen Want hy heeft seer heerlijcke dingen gedaen Pharao is verdroncken, door Gods ghehingen En Israel, is door de Roy zee, ghegaen David is nu in Ierusalem onfaen Goliath is verwonnen, laet o0ns niet claghen Sampson heeft de poorten te Gasa ghestaen Ghebroken, en opten berch ghedraghen De Moabsche Hertogen zijn nu verslagen Holofernes heeft verloren zijn hoot De stadt van Bethulien beleyt met laghen Is nu heerlijc verlost, wt alder noot Laet ons weerschappen, met ongedeesemt broot T’paeslaem is gedoot, des wy vreucht verwerven Ghy die geteeckent zijt, met zijnen bloede root Zijt ghy met Christo verresen, wilt niet meer sterven. Blijft levende rancxkens in Christo gepresen Goed evruchten doende, sonder cesseren Wetende dat Christus, vander doot verresen Niet meer en sterft, maer sal eeuwich triumpheren De doot sal over hem niet meer domineren
[pagina 88]
Hy heeft de helle berooft, de doot verslonden Wilt in die sonden, niet meer consenteren Nae dien ghy zijt ghestorven, der sonden Vander wet des doots, heeft u Christus ontbonden Acht u der sonden doot, en wilt Gode loven Maeckt dat u huysken niet ledich en wert vonden Nu de boose geest, daer wt is gedreven Want seven arger dan hy, soot is bescreven Sal my me brengen, en in vaster erven V huys besitten, wilt daer voor beven Sijt ghy met Christo verresen, wilt niet meer sterven. Alle quaetheyt, afgeset, wilt niemant hinderen Vliet achterclap, haet, nijt, leeft voort in vreden Begeert melc, als redelijcke, geboren kinderen Op dat ghy muecht opwassen in salicheden Alle vleeschelijcke begeerten, af gesneden Mach den brant der oncuysheyt in u vercouwen Want Christus Iesus, heeft voor ons geleden Om dat wy zijn voetstappen, nae volgen souwen De ydelheyt der werelt, wilt voortaen schouwen Is u siele gesuyvert, wert noch meer schoone Tghene dat ghy hebt, willet vaste houwen Op dat niemant anders, en neme u croone Is Christus in u herte coomen, metter woone Iaecht hem niet wte, wildy d’leven niet derven Want Paulus leert ons selve in persoone Zijt ghy met Christo verresen, wilt niet meer sterven. Hebt ghhy de wercken der duysterheyt afgheworpen En de wapenen des lichts ane ghetoghen Wilt ghelijck den hont, niet weder op slorpen D’onreynicheyt, die ghy wt hebt gespogen Wentelt niet weder int slijc, slachtende, der sogen Zijt ghy door penitentie, gewasschen reene Tquaet geselschap, voortijts van u geplogen
[pagina 89]
Schout nu en pijnt u daer af te scheene Vliet doorsaken der sonden, groote en cleene Die u voortijts te valle, hebben ghebrocht Maect u metter werelt, niet gemeene Leeft nu nae den gheest, hebt ghy tvleesch ghesocht Niet mer silver, oft goude, sijt ghy gecocht Maer metten bloede des lams, soet als conserven Ghy die door hebt gelegen, inder sonden crocht Zijt ghy met Christo verresen, wilt niet meer sterven Van allen boosen wercken, wilt nu voort rusten Hebt ghy dwarachtich, Hemels broot, gesmaect Laet u nae dmeel van Egypten niet lusten Zijt ghy wt Sodoma, en Gomorra, geraect Siet niet omme, als Loths wijf oft ghy wert gelaect Soo doende, mocht ghy, in steenen verkeeren Sijt neerstich int gebet, want u vyant waect V omgaende als een leeu, nae Petrus leeren Soo ghy u leden hebt ghebruyckt in oneeren Gebruyctse nu in Gods dienste, nae Paulus raet Wandelt voorsichtelijc, inden wech des heeren Den tijt waer nemende, want de dagen zijn quaet Siet dat ghy niet en valt, eest dat ghy staet Is u schult vergeven, wilt geen nieu opkerven Wacht dat ghy Gods gratie, niet en versmaet Sijt ghy met Christo verresen, wilt niet meer sterven Prince. Sijt ghy wt Pharaonis handen verlost Wilt nae dlant van Egypten, niet omkijcken V te wasschen heeft Christo, al zijn bloest gecost Dus en wilt u ziele, niet weder beslijcken Sijt ghy warachtelijck verresen, latet blijcken Bedroeft u int quaet, daer ghy in hebt verblijt Wilt wt den wech der penitentiën niet wijcken Om der weirelt ghenuchte, desen lustigen tijt
[pagina 90]
Bereyt u siele tot tentatien, v naect strijt Wilt ghy v tot Gods dienste keeren voorwaer De werelt sal v bevechten, en s’vyants nijt En v eygen vleesch, geenen strijt so zwaer Neempt v cruyce op v, en volcht Christum naer De genuchte der werelt, acht min dan scherven Al siet ghy quaet exempel, hier en daer Zijt ghy met Cristo verresen, wilt niet meer sterven.

Vorige Volgende

Refereyn.