Den Bybel met groter neersticheyt ghecorrigeert (Liesveltbijbel 1542)

¶ Hoe dat God Noe seghende ende sine sonen, ende met hem een verbont maecte, ende beuestichde den houwelijcken staet. Trecht des wereltliken swaerts, ende den regenboghe tot een teeken des verbonts

Dat .ix. Capittel.

1

ENde God ghebenedide Noah, ende sijn sonen, ende sprac, Sijt vruchtbaer, ende vermeerdert v, ende veruult die aerde.

2

Ende v vreese ende ancxt si op alle dieren der aernen, op alle vogelen onder den hemel, ende op al datter opter aerden cruypt, ende alle visschen der zee sijn in dijn hant gheleuert.

3

Al wat hem ruert ende datter leeft, dat si v spijse, gelijc groene cruyt heb ict v al ghegeuen.

4

Dat wtghenomen, en eet dat vleesch met den bloede niet, daer die siel in is

5

want ick wil v bloet daer v siele in is, van allen dieren handen eysschen ende wil des menschen siele vereysscen van des menschen

[p. *]

handen eens yegelicx siele van des anders handen.

6

So wie des menschen bloet stort, diens bloet sal ooc voor menschen gestort worden, want God heeft den mensch na sijn beelt gemaect,

7

weest vruchtbaer, ende vermeerdert, ende gheneert v opter aerden, dat uwer vele daer op worden ⁺

+ Matth. xxvi.e dat weerlick swaert set God hier in.

8

⁺Noch sprac God tot Noah, ende tot sijn sonen met hem,

+ B vers 8

9

Siet, ic sette mijn verbont met v lieden, ende met uwen sade, ende met v,

10

ende met alle leuende dieren bi v, van vogelen tot vee, ende tot alle dieren der aerden, by v, ende al dat wter arcken gegaen is so wat dier dat si opter aerden,

11

Ende stelle mijn verbont met v, dat voort aen niet meer alle vleesch verdoruen en sal worden metten water der diluuien, ende en sal voort aen geen diluuie meer comen, die daerde verderue

12

Ende God sprac, dat is dat toeken mijns verbonts, dat ic gemaect heb tusschen mi, ende v, ende alle leuende dieren met v, voort meer ende eewelic,

13

Mijnen boge heb ic geset inden wolcken, die sal dat teeken sijn mijns verbonts tusschen mi ende der aerden.

14

Ende als ic den hemel sal hebben ouertogen met wolcken, so salmen mijnen boge sien inden wolcken,

15

ende dan sal ic gedachtich wesen mijns verbonts tusschen mi ende v, ende alle leuende dieren, in alderley vlees dat niet meer voort aen eenige diluuie come, die alle vleesch verderue.

16

Daerom sal mijnen boge in die wolcke sijn dat ic hem aensie, ende gedencke aen dat eewighe verbont tusschen God ende alle leuenden dieren in allen vleessche, dat opter aerden is.

17

Dit selue seyde God ooc tot Noah, dit sal sijn dat teeken des verbonts dat ic gedaen heb tusscen mi ende alle vleessche opter aerden

18

⁺Die sonen Noah die wter arcken ginghen sijn dese, Sem, Ham, Iaphet, Mer Ham is die vader Canaan,

+ C vers 18

19

dit sijn die drie sonen Noah, van desen wert alle lant beseten

20

Ende Noah begonste ende wert een ackerman ende plantede den wijngaert,

21

ende doen hi den wijn dranc, werdt hi droncken, ende lach inder tenten ontdect.

22

Als nv Ham Canaans vader sijns vaders manlicheyt sach, seyde hijt beyde sinen broederen daer buten ⁺

+ Iesa. v a. Matth. xxij.c

23

Doen namen Sem ende Iapht haer cleederen, ende leydense op haerder beyder schouderen ende si ghinghen erselincks daer toe, ende decten haers vaders manlicheyt toe, ende si keerden haer aensichte, op dat si haers vaders manlicheyt niet en saghen.

[afbeelding]

24

⁺Als Noah ontwaecte van sinen wijne, ende vernam wat hem sine ioncste sone gedaen hadde, so seynde hy

+ D vers 24

25

Vermaledijt si Canaan, ende si een knecht alder knechten, sijnre broederen, ende noch seyde hi,

26

ghelooft si God die HERE Sems, ende Canaan si sijn knecht,

27

God breyde Iaphet wt, ende laet hem wonen in Sems wooninghen, ende Canaan si zijn knecht

28

Noah leefde na der diluuien drie hondert ende vijftich iaer, dat alle sijn gheheel ouderdom wert neghen hondert ende vijftich iaer, ende hi sterf.