Den Bybel met groter neersticheyt ghecorrigeert (Liesveltbijbel 1542)

¶ Ioseph gheeft sinen broederen te kennen dat hi seyndt tot sinen vader, Iacob werdt seer verblijt als hy hoort dat sijn soon noch leefde.

Dat .xlv. Capittel

1

⁺NIet langher en mocht hem Ioseph bedwinghen daer veel lieden bi hem stonden waerom dat hi gheboot, dat si alle daer buyten gaen souden, ende nyemant vreemders en was bi hem, als Ioseph met sinen broederen hem liet kennen,

+ A vers 1

2

ende Ioseph weende so luyde, dat die Egyptenaren ende Pharaos gesin hoorden, ende sprac tot sinen broederen.

3

Ic ben Ioseph, leeft mijn vader noch? Ende sijn broederen en conden niet gheantwoorden, so verscricten si voor sijn aensicht.

4

Maer hi sprac, coemt toch hier tot mi. Ende si ginghen bi hem, Ende hi sprac. Ick ben Ioseph uwe broeder dien ghi lieden in Egypten vercocht hebt,

5

Ende nv en becommert v niet, ende en denct niet datter wreetheyt is, dat ghi lieden mi hier vercocht hebt, want om ws leuens wille heeft mi God voor v hier ghesonden, want nv sijnt twee iaren, dat dierte int lant geweest is,

6

ende tzijn noch vijf iaren, datter geen ploegen noch oogsten en sullen sijn.

7

Maer God heeft mi voor v hier ghesonden, dat hi v lieden opter aerden soude laten blijuen, ⁺ ende uwe leuen behouden door een groote verlossinghe,

+ B vers 7

8

Ende ghi lieden en hebt mi hier niet ghesonden, Maer God die heuet mi Pharao tot eenen vader gestelt, Ende tot eenen Heere ouer alle sijn huys, ende Vorst in alle Egypten lant,

9

Haestet v nv, ende reyst op tot mijnen vader, ende segt hem, dat laet v Ioseph v soon seggen, God heeft mi tot eenen heere ouer alle Egypten lant gesedt, coemt af tot mi, ende versuymt v niet,

10

ghi sult in dat lant Gosen woonen, ende na bi mi sijn, ghi ende v kinderen, ende uwer kinder kinderen, uwe cleyn ende groot vee, ende alle dat ghi hebt,

11

ic sal v daer besorgen, want het sijn noch vijf iaren der dierten, op dat ghi niet en verderft met v huys, ⁺ ende al dat ghi hebt.

+ C vers 11

12

Siet uwe oogen sien, ende die oogen mijns broeders BenIamin dat ick mondelijck met v spreke,

13

vercondicht mijnen vadere alle mijn heerlicheit in Egypten, ende alle wat ghi gesien hebt, Haest v ende coemt hier af met mijnen vadere.

14

Ende hi viel sinen broeder BenIamin om den hals, ende weende, ende BenIamin weende ooc aen sinen halse,

15

⁺ende custe alle sine broederen, ende weende ouer haer lieden, daer na spraken sine broederen met hem.

+ D vers 15

16

Ende als dat gheruchte quam in Pharaos huys, dat Iosephs broederen ghecomen waren, ghenuechdet Pharao wel, ende allen sinen knechten.

17

Ende Pharao sprac tot Ioseph, Segt uwen broederen, Doet hem also, ladet uwe dieren, reyst henen, ende als ghi lieden coemt int lant Canaan,

18

so neemt uwen vader, ende uwe gesin, ende coemt to mi, ⁺ ic sal v goet gheuen in Egypten lant, dat ghi eten sult, tmerch des lants,

+ E vers 18

19

Ende gebodet haer doet hem also, neemt v wt Egypten lant wagenen tot uwen kinderen ende wijuen, ende voert uwen vader, ende coemt,

20

ende en mijdet uwen huysraet niet, want alle die goeden des gansschen lants van Egypten, die sullen uwe sijn.

21

⁺Die kinderen van Israel deden also, ende Ioseph ghaf hen wagenen na Pharaos beuel, ende teeringhe op den wege,

+ F vers 21

22

ende gaf hen allen een yegelijcken een viercleedt. Mer BenIamin gaf hi drie hondert silueren penninghen, ende vijf viercleederen,

23

Mer den vader sandt hi thien ezelen met goede wt Egypten gheladen, ende thien ezellinnen met grane ende broot, ende spijse sinen vadere opten weghe.

24

Aldus liet hi sine broederen, ende sprac tot hen, en hebt inden wege gheenen twist.

25

⁺Aldus reysden si wt Egypten, ende quamen int lant Canaan tot haren vadere Iacob,

+ G vers 25

26

ende vercondichden hem ende seyden, uwe soon Ioseph leeft noch ende hi is een heere ouer alle Egipten lant, Mer sijn hert sloecht inden wint, want hi en gheloofdes niet

27

Doen seyden si hem alle Iosephs woorden, die hy tot hen gheseyt hadde. Ende als hi sach die waghenen die

[p. *]

hem Ioseph ghesonden hadde, om hem te voeren wert sinen gheest leuendich ende sprac,

28

Ick heb genoech dat mijnen soon Ioseph noch leeft, Ic wil daer henen trecken, ende ick hem sie eer ic sterue.