Den Bybel met groter neersticheyt ghecorrigeert (Liesveltbijbel 1542)

Vanden Paesch feest, Ende hoe die onreyne dat houden sullen vander wolcken bouen der tenten

Dat .ix. Capittel

1

⁺ENde die HERE sprac met Mose in die woestine Sinai, inden tweeden iare, nae dat si wt Egipten lant getrocken waren in die eerste maent, ende sprac,

+ A vers 1

2

Laet die kinderen van Israel Paesscen houden tzijnder tijt,

3

inden ,xiiij. dage van deser maent ontrent den auont, tot sijnder tijt sullen sijt houden, nae alle sijn wedt ende recht,

4

Ende Mose sprack met den kinde-

[p. *]

ren van Israel, dat si dat Passah houden souden,

5

ende hielden Passah, inden .xiiij. daghe vander eerster maent tsauonts, in die woestijne Sinai, die kinderen van Israel, dedent also die HERE Mose geboden hadde.

6

Doen waren daer sommige mannen, die onreyn waren, van eenen dooden mensche, dat si niet en consten Passah gehouden in dien dage, ende die quamen voor Mose ende Aaron inden selfden dage,

7

ende spraken tot hem, Wi sijn onreyn van eenen dooden mensche, waerom sijn wi veracht, ⁺ dat wi niet brengen en mogen onse giften den HEERE, tzijnder tijt onder die kinderen van Israel? Mose antwoorde hen,

+ B vers 7

8

staet stille, ic sal horen wat v die HERE gebiet.

9

Ende de HERE sprac tot Mose seggende, Segt den kinderen van Israel ende spreect.

10

Als yemant onreyn is van eenen dooden, of verre van v lieden reyst ouer tvelt, oft onder v vrienden, die sal ooc Passah houden,

11

Maer dat sal hi houden inder tweeder maent, inden .xiiij. daghe des auonts, Met ongeheefden broode, ende met sout sullen sijt eten

12

Ende en sullender niet af ouerlaten totten morgen, geen been en sullen si daer af breken, ⁺ ende si sullent al nae die maniere vanden Passah houden.

+ io. xix.g

13

Maer wie dat suyuer is, ende int velt niet en is ende den Passah niet en hout, diens siele sal wtgheroeyt worden van sinen volcke, om dat hi sijn gaue niedt ghebracht en heeft tsijnder tijt, den HERE, Hi sal sijn sonde dragen.

14

Ende als een vreemdelinc bi v woont die sal ooc Passah houden den HERE, ende salt houden nader wet, ende recht des Passah, dese wet sal v lieden ghelijck sijn, so wel den vreemdelinc als den ingheboren

15

Ende in dien dage doen den tabernakel opgerecht wert, ^{+ +} bedectese een wolcke, bouen op die tente des ghetuychnis, ende van tsauonts totten morgen was ouer den tabernakel een ghedaente des viers,

+ exo. xl d

+ C vers 15

16

Also gebuerdet altijt, datse dye wolcke des daechs bedecte, ende die gedaente des viers inder nacht.

17

Ende na dien dat die wolcke ophielt vander tenten, soo reysden die kinderen van Israel, Ende ter plaetsen daer die wolcke staende bleef, daer maecten dye kinderen van Israhel haren leegher,

18

Nae den woorde des HEEREN trocken die kinderen van Israel, ende na sinen woorde, maecten si haren leegher, Also langhe als die wolcke op den Tabernakel bleef, so langhe laghen si stille,

19

Ende als die wolcke veel daghen op den Tabernakel bleef, so waecten die kinderen van Israel op die waecke des HEEREN, ende si en reysden nyedt

20

Ende wanneer dat die wolcke op den Tabernakel was eenich getal van dagen, so maecten si haren leegher, na dat woort des HEREN, ende si trocken na den woorde des HEREN,

21

⁺als die wolcke daer was van tsauonts totten morghen, ende haer verhief, so trocken si, oft wanneer si haer verhief, des daechs, oft des nachts, so reysden si ooc.

+ D vers 21

22

Mer als si twee dagen, oft een maent oft wat langer op den Tabernakele bleef, so laghen die kinderen van Israel, ende si en reysden niet, maer als haer die wolcke verhief, soo trocken si voort,

23

want na des HEREN mont, laghen si, ende na des HEEREN mont reysden si, dat si des HEEREN waeck wachten, na des HEEREN woort door Mose.