Den Bybel met groter neersticheyt ghecorrigeert (Liesveltbijbel 1542)

Als si int lant comen so en sullen si geen vrientschappe, noch ghemeynschappe met dyen volcke houden. Maer si sullense wt roeden. Ende van haer nyet verscricken

Dat .vij. Capittel.

1

⁺ALs die HERE v God, v brenghen sal in dat lant daer ghi in comen sult, om dat te besitten, ende wtwortelt veel volcx voor v, die Hethiten. Girgositen Amoriten, Cananiten, Pheresiten, Heuiten, ende die Iebusiten, seuenderley volc, die grooter ende starcker sijn dan ghi,

+ A vers 1

2

Ende alse die HERE v God voor v leuert, dat ghijse slaet, soo suldise te nyete doen, ende geen verbont met hen maken, noch hem geen gonste bethoonen, ghi en sult met hen gheen vrientschap maken,

3

ghi en sult niet geuen uwe dochteren haren sonen, ende hare dochteren en suldy nyedt nemen uwen sonen.

4

Want si souden uwe sonen verleyden, dat si mi nyedt volgen en souden, mer dat si anderen goden dienen souden, Ende dan soude des HEREN toren vergrammen op v, ende hi soude v te nyeute doen

5

Mer aldus suldy met hen doen, haer outaren suldi om worpen, ende haer calomnen breken, hare boschkens suldi afhouden, ende haer godekens metten viere verbernen.

6

⁺Want ghi zijt een heylich volc den HERE uwen God, ⁺ die HERE uwe God, heeft v vercosen, dat ghi sout sijn, zijn eyghen volc, wt allen volcken, dat opter aerden is,

+ B vers 6

+ Corint. xxiij.

7

Die HERE en heeft daer om geenen lust tot v gehadt, om dat ghi allen volcke te bouen ginct inden getale.

8

Want ghi zijt die minste onder allen volcke. Mer daerom, om dat hy v lief gehadt heeft, ende om dat hi sinen eedt houden soude, die hi uwen vaderen gesworen heeft, ende hi heeft v gheleyt met een machtige handt, ende hi heeft v verlost vanden diensthuyse, wt Pharaos des conincx van Egipten hant.

9

Ende ghi sult nv weten, dat die HERE uwe God een Godt is, ende een ghetrouwe Godt, die dat verbont, ende die barmherticheyt hout, den genen die hem lief hebben, ende sijn geboden houden, int duysende lidt

10

ende hi betaelt den genen dye hem haten, voor sine aengesicht. Also dat hijse te nyeute doet, ende hy en laet dat nyedt, hi en betaelt hen voor sinen aensicht, den genen die hem haten.

11

Daerom onthout die geboden die seden, ende rechten, die ic v heden gebiede, dat ghy daer na doen sout

12

⁺Ende als ghi dese rechten hoort, ende ghijse hout, ende daer na doet, so sal die HERE v God oock houden dat verbont, ende die barmherticheyt, die hi uwen vaderen gesworen heeft,

+ C vers 12

13

ende hi sal v liefhebben, ende gebe-nedien, ende vermenichfuldigen. Ende hi sal die vrucht ws lichaems ghebenedijen, ende die vruchte ws lants, v graen, uwen most, ende olie, uwer koyen vruchten, ende uwer schapen vruchten, inden lande dat hi gesworen heeft, uwen vaderen dy te geuen,

14

Gebenedijt suldi wezen bouen alle volc, van v lieden en sal niemant onuruchtbaer wesen, noch ooc v vee. ⁺

+ Ex. xiiij

15

Die HERE sal van v nemen alle crancheyt, ende hi en sal geen vanden quaden siecten der Egiptenaren op v leggen die ghi gesien hebt, ende allen den ghenen die v haten, sal hijse toe seynden.

16

Ghi sult alle volc verslinden, dat die HERE uwe God, v geuen sal, ghi en sultse niet sparen, noch haren goden dienen, want dat soude v eenen stric zijn,

17

Ist dat ghy in uwer herten segt, dit volc is meerder dan ic ben, hoe sal icse mogen verdriuen,

18

so en vreest hen niet. ⁺ Mer ghedenct wat die HERE uwe God Pharao, ende alle den Egiptenaren gedaen heeft,

+ D vers 18

19

door grote versoeckingen, die ghi met uwen oogen gesien hebt, ende door teekenen ende door wonderen, door een machtige hant, ende wtghestrecten arm daer mede dat uwe HERE uwe God v wtleyde, Also sal die HERE v God, ooc allen volcke doen die ghi vreest

20

Ende die HERE v God sal onder hen Horselen seynden, tot dat si vergaen, al watter ouer blijft, ende dat hem voor v verbercht.

21

En laet v voor hen niet grouwelen. Want die HERE uwe God is onder v die grote ende vreeschelijcke God,

22

Hi die HERE uwe God sal dese lieden wt wortelen voor v, die een na den anderen Ghi en contse niet al te nyete gedoen tsamen haestelijc op dat die dieren des velts niet vermenichfuldicht en worden tegen v,

23

⁺Die HERE uwe God, salse voor v leueren, ende ghi sultse met groten slagen verslaen, tot dat si geheel vergaen.

+ E vers 23

24

Ende hi sal haren coninck in uwe handen leueren, ende ghi sult haren naem te nyete doen, van onder den hemel, nyemant en sal v mogen wederstaen tot dat ghijse verdoruen hebt

25

Die beelden van haren goden suldy met viere verbernen, Ende ghi en sult nyet begeren dat siluer oft goudt dat daer aen is, noch aenueerden, op dat ghi daer aen niet en misdoet, Want dat is den HERE uwen God een grouwelic dinc,

26

daerom en suldi dat grouwelijc dinc in v huys niet brengen, op dat ghi niet verbannet en wort, gelijc dat selue is. Mer ghi sult dat scouwen, ende v sal daer af grouwelen, want het is verbannen