Den Bybel met groter neersticheyt ghecorrigeert (Liesveltbijbel 1542)

Thola ende Iair regeren dat volck, Die Israeliten sondigen, ende daeromme worden si ghestraft.

Dat .x. Capittel.

1

⁺NAe AbiMelech stont een ander salichmaker op in Israel, ⁺ Thola een man van Isaschar, ende een soon Pua, welcke sijns vaders broeder soon was, ende woonde tot Samir op dat gheberchte Ephraim,

+ A vers 1

+ Thadye neghenste rechter

2

ende oordeelde Israhel drientwintich iaer ende sterf, ende wert begrauen tot Samir,

3

Na hem stont op Iair, ⁺ een Giliaditer, ende oordeelde Israel .xxij iaer,

+ Iair dye thiende rechter

4

ende hadde dertich sonen, op dertich ezel vuelens rijdende, ende hadde dertich steden, die hieten, HauotIair, ⁺ tot desen dage toe, ende liggen in Gilead,

+ B vers 4

5

ende Iair sterf, ende wert begrauen te Kamon

6

Mer die kinderen Israel deden noch quaet voor den HEEE, ende dienden Baalim ende Astharoth, ende den Goden tot Siria, ende den Goden tot Zidon, ende den Goden Moab, ende den Goden der kinderen Amon ende den Goden der Philisteen, ende verlieten den HERE, ende en dienden hem niet.

7

Doen verbolch die gramscap des HEREN ouer Israel, ende gafse ouer onder die hant der Philisteen, ende der kinderen Amon.

8

Ende si quelden ende verdructen die kinderen Israel, achtien iaer lanc, op geen side der Iordanen, inden lande der Amoriten, dat in Gilead leyt.

9

Daer toe trocken die kinderen Amon ouer die Iordane, ende streden tegen Iuda, BenIamin, ende tegen dat huys Ephraim, also dat Israel seer benaut wert.

10

Doen riepen die kinderen Israel totten HERE ende seyden. Wi hebben aen v gesondicht, want wi hebben di onsen God gelaten, ⁺ ende Baalim gedient,

+ C vers 10

11

Mer die HERE sprac totten kinderen Israel. En hebben v die Egiptenaers ooc niet gedwonghen,

12

ende die Amoriten, ende die kinderen Amon, die Philisteen, ende die Sidoniters, die Amalekiten ende Maoniten,

13

ende ick halp v wt haren handen, doen ghi tot mi riept, nochtans hebt ghi mi verlaten, ende ander Goden gedient Daerom en wil ic v niet meer helpen.

14

Gaet henen, ende roept die Goden aen, die ghi vercoren hebt, ⁺ laet v die helpen inder tijt uwer tribulatien.

+ D vers 14

15

Mer die kinderen Israel spraken totten HERE Wi hebben gesondicht, doet ghi ons wat v belieft alleen verlost ons tot dese tijt,

16

ende si deden die vreemde Goden van hen, ende dienden den HERE,

17

ende zijn siele benaude hem ouer den arbeyt Israhel

Ende die kinderen Amon beriepen hen, ende legerden hen in Gilead, mer die kinderen Israel vergaderden ende legerden hen tot Mizpa,

18

Ende dat volc der ouersten tot Gilead, spraken onder malcanderen, Die begint te strijden teghen die kinderen Amon, die sal dat hooft sijn, ouer alle die in Gilead woonen