Den Bybel met groter neersticheyt ghecorrigeert (Liesveltbijbel 1542)

Dat .xviij. Capittel.

1

⁺WIe lust heeft oneenicheyt te verwecken Die soect twist waer het ghelucken wil.

+ A vers 1

2

Een sotte en heeft gheenen lust aen verstant, Mer, so wat in sijn herte omme gaet.

3

Waer die godloose coemt, daer comt ooc verachtinge, Ende smaet met schimpe.

4

Die woorden in eens mont sijn gelijc diepe wateren, Ende die fonteyne der wijsheyt is eenen vollen stroome.

5

Het en is niet goet den persoon des godloosen te achten, Den gherechten int oordeel te buygen.

6

Die lippen des sotten comen in twist, ⁺ ende sinen mont haket na slaghen.

+ B vers 6

7

Den mont des sotten scheyndet hem seluen, Ende sine lippen vanghen sine eygene siele.

8

Dye woorden des ^a aenbrengers sijn slaghen, ende varen in die camere des buycx

a Aenbrengers dat sijn die dat woordt Goods verachteren, ofte die den prince blasphemeren.

9

Wie laetueerdich is in sinen arbeyt, dye is een broeder dies die verderuet.

10

Dye name des HEREN, is een vaste slot, Die gherechtighe loopt derwaerts, ende wort beschermt.

11

Dat goet des rijcken is een vaste stat, ende ghelijck een hooge muere rontsomme hem.

12

Eens menschen herte verheft hem eer het ghebroken wort, Ende allendic-heyt coemt voor die eere.

13

Wie antwoort eer hi hooret, die heeft sotheyt ende schande.

14

Des menschen gheest eyndet sine cranckheyt. ⁺ Mer wie can eenen bedroefden gheest ghedraghen.

+ C vers 14

15

Een verstandich herte heeft bescheydenheit, Ende der wijsen oore soect bescheydenheyt.

16

Dat gheschencke des menschen maect hem ruymte Ende wort voor die princen gebracht.

17

Dye gherechtighe beschuldicht hem eerst, Coemt sijn naeste soo vindet hi hem.

18

Dat lodt stillet den twist, ende scheydet tusschen die machtige.

19

Een broeder dye bystaet is gelijc een vaste stadt, Ende die aen malcanderen houden, gelijc grendelen aen slot.

20

Eenen man wort sinen buyck vol vander vruchten sijns monts, Hi wordt versadet vanden incomene sijnder lippen.

21

Doot ende leuen staet inder hant der tonghen, Wiese bemint die sal van haerder vrucht eten

22

Wie een wijf vindet, dye vindet wat goets, Ende scheppet een welbehagen vanden HERE.

23

Een arme spreect met smeecken, Een rijcke antwoort stoutelijc.

24

Een vriendelijck man tot vrientschappen, Heeft lieuer ende hanghet meer aen dan een broeder.