Den Bybel met groter neersticheyt ghecorrigeert (Liesveltbijbel 1542)

Hier beghint dat hooghe liet Salomo.

[afbeelding]

¶ Dat eerste Capittel.

1

⁺HI cusse my metten cusse sijns monts, want uwe borsten sijn lieflijcker dan wijn datmen uwe ^a goede salue riecke,

+ A vers 1

a Dese salue is die gratie des heyligen gheests, waer mede alle cristenen ghesalft sijn.

2

Vwen name is een wtghestorte salue. Daerom beminnen v die meyskens.

3

Trect mi na v, so lopen wi, Die coninc leydet mi in sine camere, Wi verblijden ons, ende sijn vrolic ouer v Wi gedencken uwer borsten meer dan des wijns. Die oprechtige beminnen v.

4

Ic ben swart mer seer lieflic, ghi dochter Ierusalem, gelijc die tenten Kedar, gelijc die tapite Salomo

5

En siet mi niet ane, dat ic so swart ben, want die sonne heeft my so verbernt, ⁺ Mijnder moeder kinderen sijn toornich op mi, men heeft mi tot eender bewaerderssen der wijnbergen geset, maer mijnen wijnberch dien ic hadde, en hebbe ick niet bewaert.

+ B vers 5

6

Gheeft my te kennen, ghi die mijn siele bemint, waer ghi weydet, waer ghi rustet, inden middage, op dat ick nyet herwaerts ende derwaerts gaen en moete, by die cudden uwer gesellen.

7

En kent ghi v niet ghy schoonste onder den wijuen, so gaet wt op dye voetstappen der schapen. ⁺ Ende weyt uwe bocken byder herderen huysen

+ C vers 7

8

Ic gelijc v mijn vriendinne, mijnen reysigen getuych aenden wagen Pharao.

9

Vwe wanghen staen lieflick inden spansel,

10

ende uwen hals in die keten, wi willen v gulden spanselen maken, met silueren puckelkens.

11

Doen hem die coninck herwaerts keerde, ghaf mijnen narde sinen ruecke,

12

mijn vrient is mi een bosselken myrren, dat tusschen mijne borsten hanghet,

13

mijn vrient is mi een druyuecoffer inden wijngaerden te Engeddi.

14

⁺Siet mijne vriendinne, ghi sijt schoone, schoone sijt ghi. Vwe oogen sijn gelijc duyuen ooghen

+ D vers 14

15

Siet mijne vrient, ghi sijt schone ende lieflic.

16

Onse ^b bedde groenet, onser huysen balcken sijn cederen, onse latten sijn cypressen.

b By dat bedde verstaet dye scriftuere, tgene daer hem die mensche toe versaet ende oprustet.