Den Bybel met groter neersticheyt ghecorrigeert (Liesveltbijbel 1542)

Van die straffinghe Hierusalem, die si veracht om dat si dye wet Gods verlaten, ende der menschen insettingen aenhanghen

Dat .xxix. Capittel.

1

⁺WEe v O Ariel Ariel, Du stadt des leeghers Dauid, Ghi hout iaerghetijden ende viert feesten,

+ A vers 1

2

Maer ic wil den Ariel benauwen dat hi truerlick ende bedruckt si, ende hi sal mi een rechte Ariel zijn,

3

want ic wil v belegeren rontomme, ende ic wil v benauwen met bolwerc, ende wallen om v laten maken,

4

Als dan suldy vernedert worden, ende wter aerden spreken, ende wt den ^a stof met dijnder redene mommolen, dat dijne stemme si gelijc eens toouenaers wt der aerden, Ende dijne redene wt den stoue morren,

a Stof dat is ongelooue.

5

Ende die menichte die v verstroyen, dier sal so vele sijn als een dunne stof, Ende die menichte der Tyrannen, ghelijc een weysterende kaf, Ende dat sal corts onuoorsiens geschieden,

6

Want ghy sult vanden HERE Sebaoth besocht werden, met een onweder ende eertbeuinghe ende grooten dondere, met eenen draywint, ⁺ met eenen grooten onweder, ende met een vlamme des verteerenden viers.

+ B vers 6

7

Mer gelijc als een nachtgesicht inden droome, so sal sijn die menichte aller heidenen, die tegen Ariel striden, tsamen met alle haer heyr ende bolwerc, ende dye hem benauwen,

8

Want gelijc als eenen hongerigen droomt, dat hi etet, mer als hi ontwaect, so is sijn siele noch leech ende ydel, Ende gelijc als eenen dorstigen droomt, dat hi drinct, mer als hi ontwaect, so is hi mat ende dorstich, Also sullen sijn die menichten aller heydenen, die tegen den berch Sion strijden.

9

Wordet verbaest ende versaecht, verblint v, ende wort ^b droncken, nochtans niet van wijn Strukelt, nochtans niet van stercken dranc,

b Door dese dronckenscap verstaetmen de wense deser wereldt, die alleen op haer seluen betrouwen ende so onsienich worden in die wijsheyt Gods. mat. xx. psalmo. xxxv.

10

want dye HERE heeft v eenen gheest des stercken slaeps ingesent, ende uwe ooge toegedaen, Vwe propheten ende vorsten, metten Sienders heeft hi verblint,

11

alsoe dat v alder propheten gesichten sijn geworden, ghelijc als dye woorden van eenen gesloten boecke, Alsmen dat selue eenen geeft, eenen die lesen can, Ende hi segge, Lieue leest doch dat, Ende hi antwoorde, Ic en can niet, want het is ghesloten,

12

Oft gelijc wanneermen dat selue geeft eenen die niet lesen en can, Ende hi segge, Lieue leest doch dat Ende hi antwoort, Ic en can niet lesen,

13

Daerom spreket die HEERE also, Om dat dit volck tot mi naket met sinen monde, Ende met sinen lippen mi eert, Maer haer herte verre van mi is, ende mi vreesen na menscen geboden, die si leeren.

14

So wil ic ooc met desen volcke wonderlijcken omme ghaen, op dat alder wonderlicste ende selsaemste. Ia dat die wijsheyt sijnder wijsen onderga. Ende dattet verstant sijnder cloecken verblint worde.

15

Wee den genen die verborgen sijn willen voorden HERE, haer voornemen te verbergen, ende haer werc int doncker te houden, ende seggen. Wie siet ons ende wie kent ons?

16

Hoe sijt ghi so verkeert? Gelijc oft des pot-

[p. *]

backers leem dachte, ende een werc sprake van sinen meester. Hi en heeft mi niet gemaect. Ende recht ofte een aerden vat seyde van sinen wercmeester. Hy en verstaets niedt.

17

Wel aen. Het is noch eene cleyne tijt te doen. Dan sal Libanus een blac velt worden, ende dat velt sal een wout gheacht worden.

18

Want totter seluer tijt sullen die doouen hooren die woorden des boecx. Ende dye oogen der blinden sullen wt den donckeren ende duysteren sien

19

Ende die ellendige sullen weder vruechde hebben inden HERE. Ende die arme onder den menscen sullen vrolijc sijn inden heyligen Israels,

20

als die Tyrannen een eynde hebben, ende alst metten spotters ghedaen is. Ende als vernielt sullen sijn alle die ghene die wacker sijn, om moeyte op te stellen,

21

die welcke die lieden doen sondigen doort prediken, Ende si quellen den genen, die haer inder poorten straffen, ende si wijcken door ydelheydt vanden oprechten.

22

Daeromme spreect die HERE, die Abraham verlost had, totten huyse Iacobs also, Iacob en sal niet meer te scande worden, ende sijn aensicht en sal nyet meer bescaemt worden.

23

Want als hi sien sal onder sine kinderen, ooc die welcke mijne hant ghemaect heeft, dat die selue mijnen name sullen heylighen, ende sullen den heyligen in Iacob heyligen, ende den God Israhels vreesen.

24

Ende die van eenen dolenden gheest sijn die sullen verstandich worden. Ende de swetsers sullen haer laten leeren.