Den Bybel met groter neersticheyt ghecorrigeert (Liesveltbijbel 1542)

Die Sinagoge hadde haer int voorgaende capittel beclaecht dat si van Gode verstooten was, Op dat antwoort hier onse HERE God, ende bewijst dat die schult haer si, Want si hem onghetrouwelic verlaten hadde, ende met vreemde Goden gehoereert.

Dat .L. Capittel.

1

⁺ALso spreect die HEERE. Waer is den sceytbrief dijns ^a moeders? Waer mede dat ickse verlaten hebbe? Oft waer is mijnen woeckenaer dien ic v vercocht hebbe? Siet, ghi sijt om uwer sonden wille vercoft. Ende v moeder is om uwe ouertre-

+ A vers 1

a Moeders, dat is der Sinagogen Oze. ij a Hie. ij.

[p. *]

dens wille ghelaten,

2

Waerom en was daer nyemandt doen ic quam? Ende doen ic riep en antwoorde nyemant Is mijn hant nv so cort geworden, dat si niet gehelpen en can? Oft en is bi mi geen cracht te verlossen Siet, met mijn ghebieden maeck ick die zee drooch, ende make die waterstroomen als een woestine, dat hare visschen van ghebreck des waters stincken, ende van dorst steruen.

3

Ic becleede den hemel met donckerheyt ende make sijn decsele als eenen sack.

4

⁺Die HERE der heyrscharek heeft my een welgeleerde tonghe ghegeuen, dat ic wete den becommerden ter rechter tijt te spreken, Hi wecket my allen morghen, Hi wect mi dat oore dat ic hoore, ghelijck als een leerkint.

+ B vers 4

5

† Die HERE der heyrscharen heeft mi dat oor geopent, ende ic en ben niet ongehoorsaem, ende ick en gae niet achterwaerts.

6

Ic gaf mijnen rugge den ghene die mi sloegen, ende mijn wangen dien, die mi ructen Mijn aensicht en verborch ic niet voor den smaet, ende dat steecspel,

7

Want die HERE der heyrscaren holp mi, daerom en come ic ooc niet tot schande, ende ic hebbe mijn aensicht geboden, als een keysteen, want ic wist dat ic niet te schande worden en soude.

8

Hy is na bi, die mi rechtueerdicht. Wie wil met my voor trecht twisten? Laet ons te samen gaen, wie isser die tot mi recht heeft? die come heyr tot mi,

9

Siet, die HERE Zebaoth holp mi. Wie isser die mi wilt verdoemen? Siet, si sullen altemael als een cleet verouden, ende die motten sullen haer eten.

10

Wie isser onder v lieden die den HERE vreest, die sijns knechts stemme hoore. ⁺ Die inder duysternissen wandelt, ende hem gheen licht en bescijnt, dye moet op den name des HEREN hopen, ende dye verlate hem op sinen Godt.

+ C vers 10

11

Siet, ghi alle hebt een vier aenghesteken, metter vlammen toebereyt. Wandelt henen int licht ws viers, ende inder vlammen dye ghi aenghesteken hebt. Sulcx geschiet v van mijnder hant, In smerte moet ghi daer in liggen *