Den Bybel met groter neersticheyt ghecorrigeert (Liesveltbijbel 1542)

Hi gaet noch wat beter voort metter belouinghe Messie, hi verblijt die Ioden ende dye heydenen totter toecoemst des salichmakers.

Dat .lij. Capittel.

[p. *]

1

⁺WEl op, Wel op Syon, doet uwe stercte aen. Verciert v heerlicken, O heylige stadt Hierusalem, Wandt daer en sal voort meer gheen onbesneden ofte onreyne in v regneren.

+ A vers 1

2

Schuddet dijn stof af. Staet op, O ghi geuangen Hierusalem, Trect dijnen hals wten banden, ghi gheuanghene dochter Sion.

3

Want also seyt die HERE, ghi sijt om nyet vercoft, daeromme sult ghi ooc sonder gelt ghelost worden.

4

Want also spreect die HERE der heyrscharen. Mijn volc is in voortijden afgetogen in Egypten, op dattet aldaer een gast oft vreemt soude sijn. Ende die Assyrer hadde hem sonder oorsake ooc gewelt gedaen,

5

Mer wat profijt is mi nv daer bi? spreect dye HERE, Mijn volc wort om niet verleit, Sine regeerders maken enckel huylinge spreect de HERE Ende mijnen name wort dagelicx, ende altijt gelastert,

6

Daeromme sal mijn volc mijnen naem kennen ter seluer tijt, Want siet, ic wil selfs spreken.

7

⁺Ey hoe lieflic sijn die voeten der boden opten bergen, ⁺ die daer den vrede vercondigen, een goede bootscap prediken, die salicheyt openbaren, die daer seggen tot Sion. Dijn God is coninc.

+ B vers 7

+ Ie. xlvi

8

Dijne wachters roepen luyde met haerder stemme, ende glorieren altijt met malcanderen, Want men salt metten ooghen sien, als die HERE Sion bekeeren sal,

9

Die woestijne tot Hierusalem laet vrolic sijn, ende haer alle met malcanderen verblijden, Want dye HERE heeft sijn volc getroost, ende Hierusalem verlost,

10

Die HERE heeft sinen heyligen arme verthoont voor den ooghen alder heydenen, ⁺ Ia dat alle die eynden der wereldt sien sullen die salicheyt ons Gods.

+ Exo. xij

11

Wijct, wijct, trect wt van daer, ende en ruert niet onreyns aen, Gaet wt van haer, Reynicht v, ghi die des HEEREN ghereetscap draget,

12

Want ghi en sult metter haest niet wt trecken, noch metter vlucht reysen, Want dye HERE sal voor v henen trecken. Ende die God Israels, sal v bi een vergaderen.