Den Bybel met groter neersticheyt ghecorrigeert (Liesveltbijbel 1542)

Wt die Ioden ende heydenen sal een eenighe kercke Cristi worden, sijn bruyt ende huysurouwe, ende wat vruechde ende gauen dat die van Christo vercrijgen sullen, dat wordt hier bescreuen

Dat .liiij. Capittel.

1

⁺VErblijt v, o ghi onuruchtbare die niet en baert. ⁺ Weest vrolijc met roem, ende iuychet, ghi dye nyet beurucht en sijt, want die eensame heeft meer kinderen dan die eenen man heeft, seyt die HERE.

+ A vers 1

+ gala. iiij Sap. iij. Lu. xxiij

2

Maect die ruymte dijnre wooningen wijder ende rect wt die zeylen dijnre tenten, en spaert niet strect die lakenen lange wt, ende steect dijn naghelen vast,

3

want ghi sult ter rechter ende ter slincker handt, wtbreken, ende dijn saet sal die heydenen besitten, ende inden verwoesten steden woonen.

4

En versaecht v nyet want ghi en sult niet ter schande comen, en wordt niet bloode, want ghi en sult tot geender spotterije gheraken, maer ghi sult dye schaemte dijnre ionckfrouschaps vergeten, ende en sult die versmaetheit dijns weduwescaps niet meer ghedencken,

5

wandt die v ghemaect heeft, dat is dijn man, HERE Sebaoth is sinen name, ende dijn verlosser dye heylighe in Israel, die alder wereldt God ghenaemt werdt

6

⁺Want die HEERE sal v laten in een geroepe zijn dat ghi sijt als een verlaten, ende van herten bedroeft wijf. Ende ghelijc een ioncwijf die haren houwelijck ouergetreden heeft, spreect dijn God.

+ B vers 6

7

Ick hebbe v een cleyne tijt verlaten, maer met groote bermherticheyt wil ic v tot mi vergaderen,

8

ick heb een cleyne tijt, doen ic toornich was, ia een oogenblic mijn aensicht van v verborgen, maer ick wil dijnre metter eewigher ghenade ontfermen,

[p. *]

spreect die HERE, ⁺ dijn verlosser.

+ Ezech. x Bar. iij.

9

Ende sulcx sal mi sijn gelijc dat water Noah, doen ic swoer, dat die wateren Noah niet meer en souden ouer dat aertrijc gaen. Also hebbe ic oock gesworen dat ic op v niet meer toornich sijn, noch kijuen en wille,

10

want die bergen sullen eer wijcken, ende die hueuelen eer daer henen vallen, eer dat mijn goedertierenheyt van v soude wijcken, ende eer dat verbont mijns vredes soude vergaen seyt die HERE dijn ontfermer.

11

O ghi allendige siet, ouer die welcke alle tempeesten gaen, ende ghi troosteloose, ick wil dijne mueren als een cieraet maken, ende ic wil dijn fundament van Saphieren leggen,

12

ende dijne vensteren van Cristale maken, ende dijne poorten van Robijnen, ende alle dijn palen van wtgelesene steenen.

13

Ende alle dijne kinderen sullen vanden HERE geleert sijn, ende groten vrede wil ic dijnen kinderen gheuen,

14

ende door gherechticheyt sult ghi bekeert worden. Ghi sult verre van gewelt ende onrecht sijn, Ia dat ghi oock daer niet en sult voor deruen vreesen, noch sorgen, want dat v niet en sal genaken

15

siet, wie hem tegen v bi een hoopen? ende v oueruallen?

16

Aengesien si haer versamelden sonder mi? siet ic doet dat die smit die kolen int vier aenblaest, ende een wapen daer wt maect, na sijn hantwerck, ende ick doet, dat die verderuer vergaet,

17

want alle die wapenen die teghen v ghemaect sijn, dien en salt niet ghelucken, Ende alle die tongen die haer tegen v setten, dye sult ghy int recht verdoemen, dat is dat erffenisse der knechten des HEREN, ende haer gherechticheydt die si van mi hebben, spreect die HERE.