Den Bybel met groter neersticheyt ghecorrigeert (Liesveltbijbel 1542)

God die HERE verthoont den Prophete als in eenen beeldenaer, hoe hi dat volc Iuda straffen wil vanden hoochsten aen totten nedersten.

Dat .xiij. Capittel

1

⁺ALso sprac die HERE tot mi. Gaet henen, ende crijget eenen lindenen gordel, of lendenier. Ende gordet dien om v lendenen ende en maecten niet nat.

+ A vers 1

2

Ende ic creech eenen lendenier, na tbeuel des HEREN, ende ic bant hem om mijn lendenen.

3

Doe gesciede anderwerf dat woort des HEREN tot mi ende seyde.

4

Neemt den lendenier dien du gecregen, ende om dine lendenen ghegordet hebt, ende maect v op ende gaet henen aen die Phrat oft Euphrat, ende berget hem daer in een steenrootse,

5

Ic ginc henen ende verberch hem aen die Phrat gelijc mi de HERE geboden hadde.

6

Mer na een lange tijt sprack die HERE tot mi. Maect v op ende gaet henen aen die Phrat, ende haelt den lendenier weder dien ic v geboot dat ghijen aldaer sout verbergen.

7

Ende ic ginc henen aen die Phrat, ende ic groef hem op, Ende ic nam den lendenier van de plaetse daer ic hem verborgen had. Ende siet dye lendenier was verrot, also dat hi nieuwaerts toe meer en docht.

8

⁺Doe gheschiede des HEREN woort tot mi ende seyde.

+ B vers 8

9

⁺ Also seyt die HERE, Effen also wil ic oock die grote houaerdie Iuda ende Iherusalem met den sweerde te niet maken, dat bose volc dat mijne woorden niet hooren en wil.

+ Eze .xv.

10

Mer si gaen henen na tgoetduncken haers herten, ende si volgen andere goden, op dat si die selue souden dienen ende aenbeden, si sullen worden gelijc die lendenier, die niet meer en dooch.

11

Want ghelijc die man den lendenier vast aen sijn lendenen bint, also hebbe ic seyt die HERE dat gansche huys Israhels, ende dat ghansche huys Iuda om mi gegort, dat si mijn volc souden sijn, tot eenen name, lof ende eere Maer si en hebben niet willen hooren.

12

⁺Daeromme segt haer dit woort. Alsoo seyt dye HERE God Israels. ⁺ Alle flesschen sullen met wijn geuult worden. Dan sullen si seggen Meent ghi dat wi niet en weten dat alle flesschen met wijn geuult sullen worden?

+ C vers 12

+ Deut. ij.

13

Dan segt tot haer. Also seyt de HEERE siet, Ic wil alle die in desen lande woonen, die coningen die opten stoele Dauids sitten. Die priesters ende Propheten ende alle inwoonders te Ierusalem vullen dat si droncken worden sullen.

14

Ende ic wil den eenen metten anderen die vaders metten kinderen, tegen een stooten seyt de HERE, Ende ic en wil noch sparen, noch voorby gaen noch bermhertich sijn in hare verderuinge.

15

Daerom hoort nv ende merct aen, ende en tortet niet Want die HERE heeft gesproken,

16

geeft den HERE uwen Godt die eere, eer dat duyster wordt, ende eer v voeten haer aen die doncker bergen stoten. Want als ghi niet op dat licht en wacht, so salt v in een donckerheyt ende in een dootlike duysternisse verkeert worden,

17

maer en wilt ghi sulcx niet hooren, so moet mijn siele heymelijc weenen, ⁺ om sulcker houaerdien wil, mijne ogen moeten met tranen vlieten, om dat die cudde des HEREN geuangen wech geuoert wort.

+ D vers 17

18

Segt den conic ende der coninginnen. Sidt hier beneden, want die crone dijnre heerlicheit is van uwen hoofde geuallen.

19

Die steden Suytwaerts sijn gesloten, ende daer en is niemant diese op doe. Dat ganssche Iuda is reyn wech geuoert,

20

Heft op uwe ooghen ende siet Hoe dat si vanden noorden herwaerts comen. Waer is nv die cudde, die v beuolen was, dijn heerlike cudde

21

Wat sult ghi seggen, als hi v besoecken sal? Want ghise

[p. *]

also gewent hebt, teghen, dat si vorsten ende hoofden, oft heeren sijn willen, Wat sout ghi daer toe seggen? Oft v niet ancxt aencomen en sal, ghelijc eenen wijue in kints noode?

22

Ende oft ghi dan in dijnre herten seggen woudet. Waerom coemt doch sulcx ouer my? Om die menichte dijnre misdaets wille, is v uwe scamelheyt ontdect, ende uwe beenen gebloot.

23

Can ooc een moor sijn huyt verwandelen? oft eenen lupaert sine vlecken? So cont ghi ooc goet doen, als ghi totten bose gewent sijt.

24

Daerom wil icse verstroyen als stoppelen, die vanden wint wt der woestijnen verweystert worden.

25

Dat sal dijn loon sijn, ende dijn deel dat ic v toegemeten hebbe, seit die HERE Om dat ghi mijnder vergeten hebt, ende v verlaet op logenen,

26

Daerom wil ic ooc uwe cleederen ouer thooft slaen datmen uwe scamelheyt wel sie. Want ic gesien heb dijn ouerspel, dijne brootdronckenscap, dijn scandelijcke hoerderie.

27

Ia ooc dijnen grouwel, beyde op houelen ende ackeren. Wee v Hierusalem, Wanneer sult ghy doch emmermeer gereynicht worden.