Den Bybel met groter neersticheyt ghecorrigeert (Liesveltbijbel 1542)

¶ Hananias dye valsche prophete vercondicht vryheydt Maer nyedt vanden HEERE, ende teghen hem spreeckt Ieremias, Hananias neempt dye banden van den hals Hieremie ende breecktse, hy wil daer mede bewijsen, dat Godt den bandt NebucadNesars oock alsoo breken wille. Maer dye HEERE verthoont Hieremie, dat dye gheuanghenisse veel herder worden sal.

Dat .xxviij. Capittel.

1

⁺INden vierden iaer des conincrijckx Zedekie, des Coninckx Iuda, inder vijfster maent, sprack Hananias, die sone Assur dye prophete van Gabaon tot my, inden huyse des HEEREN, inder tegenwoordicheyt der priesteren, ende des gansschen volckx, ende seyde

+ A vers 1

2

Also spreeckt dye HEERE der heyrscharen, die God Israhels, Ic heb dat iock des coninckx tot Babel, in stucken ghebroken,

3

Ende eer twee iaren om sijn, wil ick ooc dye vaten des huys des HEREN, wederomme op dese plaedtse brenghen, dye welcke NebucadNesar dye Babiloonsche Coninck wech genomen hadde, ende tot Babilonien geuoert

4

Daer en bouen Iechoniam den sone Ioakim, den coninc Iuda, met alle dye geuanghenen wt Iuda, dye tot Babilonien geuoert zijn, wil ic oock weder op dese plaetse brengen, seyt dye HERE. Want ic wil dat iock des conincx tot Babel aen stucken breken.

5

⁺Doen sprac Hieremias die propheet totten propheet Hananiam, inder teghenwoordicheyt der priesteren, ende des ghansschen volcx, dye inden huyse des HEEREN stonden, ende seyde,

+ B vers 5

6

Amen, Dye HEERE doe also, Die HERE gheue dat ghene dat ghy ghepropheteert hebt, dat hy dye vaten des huys des HEREN van Babel weder brenghe op dese plaetse met al die geuangene.

7

Mer hoort doch ooc dit woort dat ick voor dijnen ooren spreke, ende voor den ooren des gansschen volcx.

8

Die propheten die voor ons geweest sijn, van outs herwaerts, die tegen veel landen ende groote conincrijcken van oorloghe van ongheluc, ende van pestilencie ghepropheteert hebben,

9

die waren daer in geproeft, oftse God gewisselijc ghesonden hadde, wanneer dat gesciede ende quam dat dye propheet voorseyt hadde.

10

Doen nam die propheet Hananias dat iock (ofte die keten) vanden halse des Propheets Hieremie, ende bracse in stucken.

11

⁺Ende Hananias sprack inder tegenwoordicheyt des gansschen volcx. Aldus seyt dye HERE, Effen also wil ic in tween breken dat iock NebucadNezars des conincx tot Babilonien, eer twee iaer om comen vanden halse alder volcken.

+ C vers 11

12

Ende dye propheet Hieremia ginc doen zijns weghes.

Maer des HEREN woort gheschiede tot Hieremiam, na dyen dat dye propheet Hananias dat iock in tween ghebroken hadde, vanden halse des Propheten Hieremie, ende sprack,

13

Gaet henen, ende segt Hananie, Also spreect die HERE, Ghy hebt dat houten iock in stucken ghebroken, Mer ghi sult voor dat houtene een yseren iock maken,

14

Want alsoo spreect dye HERE der heyrscaren, die God Israels, Een yseren ioc wil ic alle desen volcken aenden hals hangen

[p. *]

dat si dienen sullen NebucadNezar, den Babilonischen coninc, Ende dat sullen si ooc moeten doen. Want ic wil hen ooc die wilde dieren gheuen.

15

Ende dye propheet Hieremias sprac totten propheet Hananiam, Lieue Hanania, hoordt doch, Dye HERE en heeft v niet gesonden. Maer ghy doet dat dit volc hem op luegenen verlaet,

16

daeromme seyt dye HEERE alsoo, Siet, ick wil v seynden wt die weerelt. Want binnen dit iaer sult ghy steruen, Om dat ghijse met dijne woorden vanden HERE afghekeert hebt.

17

Also is Hananias dye propheet inden seluen iare ghestoruen, ⁺ inder seuenster maent.

+ de. xviij