Den Bybel met groter neersticheyt ghecorrigeert (Liesveltbijbel 1542)

Hi straft die inwoonders Hierusalems Propheten, priesters ende ouerheeren, om haren schandelijcken lachter wille, die si bedreuen

Dat .xxij. Capittel

1

⁺ENde des HEREN woort gheschiede tot mi, ende sprac.

+ A vers 1

2

Du menschen kint, En wilt ghi niet straffen de bloetgierighe stadt? Ende haer bewijsen alle haer grouwelen? Ende segt,

3

Also spreect die HEERE God. O du stadt, die dijn bloet verghietst, op dat dinen tijt come, Ende die di beelden bi v maect, daer ghi v mede ontsuyuert.

4

Ghi besculdicht v aen dat bloet dat ghi stort, Ende besmet v aen die Goykens oft beelden die ghi maect. Waer mede ghi dijne daghen herwaerts aen loct, ende maect dat dine iaren aen comen moeten,

5

Daeromme wil ic v tot eenen spot onder die heidenen, ende tot een scimperie in alle landen maken, beyde na bi ende verre sullen si v bespotten, also dat ghi een scandelijc gerucht hebben sult, ende groten iammer sult moeten lijden,

6

Siet die vorsten in Israel, een yegelic heeft macht bi v bloet te storten.

7

Vader ende moeder verachten si. Den vreemdelingen doen si gewelt ende onrecht, Den weduwen ende weesen beswaren si,

8

Du verachtest mijn Heilichdom ende ontheylicht mijnen Sabbath.

9

Verraders ende moorders zijn in v, op dat si bloet mogen storten, Si eten op de bergen, Si handelen in v na haerder herten lust,

10

Si ontdecken die scaemte der vaders, ende die vrouwen in haerder crancheyt sceynden si,

11

ende si bedriuen onder malcanderen die naeste met des naesten huysurouwe grouwelen Si schenden haerder sonen wijuen, met alle vermetentheyt, Si vercrachten haer eyghen susteren, haerder vaders dochteren,

12

Si nemen gescencken om bloet te vergieten, Si woeckeren, ende nemen ouerschot onder malcanderen, ende bedrijuen haer giericheyt tegen haren naesten, ende bedriegen malcanderen, ende vergeten also mijnder, spreect die HERE God.

13

Siet, Ic slae mine handen te samen, ouer die giericheyt die ghi bedreuen hebt, ende ouer dat bloet dat in v gestort is.

14

Meenstu dattet dijne herte sal mogen lijden, ende dijne handen verdragen? ter tijt dien ic ouer v brengen sal? Ic die HERE hebt gesproken, ende ic wilt ooc doen,

15

ende wil v verstroyen onder die heydenen, ende v verstooten in die landen. Ende ic wil dijnre onsuyuerheden een eynde maken,

16

dat ghi bi die heydenen moet vermaledijt geacht worden, Ende leeren dat ic die HERE ben.

17

⁺Ende des HEREN woort gesciede tot mi, ende sprac.

+ B vers 17

18

Du menschen kint, Dat huis Israels is mi tot schuyme geworden Alle haer coper, tin, yser, ende loot dat is inden ouen tot siluer schuyme gheworden.

19

Daeromme seyt die HERE God also. Aenghesien dat ghi alle schuym geworden sijt, Siet, so wil ick v alle tot Hierusalem te samen brengen,

20

ghelijck alsmen dat

[p. *]

siluer, coper, tin, yser, ende loot tsamen doet inden ouen, Datmen een vier daer onder op blase, ende versameltet,

21

Also wil ic v ooc in mijnen toorne ende verbolgentheyt tsamen doen, inleggen ende smelten,

22

Ia ic wil v versamen, ende dat vier mijnder gramscappen onder v opblasen, also dat ghi daer inne versmelten moet, ghelijc dat siluer versmelt inden ouen, also sult ghi ooc daer in versmelten, Ende weten dat ick die HERE mijnen thoorne ouer v wt gheschudt hebbe.

23

Ende des HEREN woort gheschiede tot mi, ende sprac.

24

Du menschen kint, Segt tot haer, Du bist een lant, dat niet te reynigen en is, gelijc dat gene, dat niet bereegent en is, inder tijt der gramscappen.

25

⁺Die propheten die in v sijn, die hebben ouer een verdragen, die sielen te verslinden, gelijc een brullende leeuwe, dye hem des roofs gheneert, Si scrabben ghelt ende goet tot haer, ende maken der weduwen vele in v,

+ C vers 25

26

Hare priesters bedrijuen gewelt ende onrecht onder den name des wets, ende si ontheyligen mijn Heylichdom. Tusschen dat heylige ende onheylige en maken si geen onderscheet, Ende en achten niet wat reyn ende onreyn si, Ende si en wachten mijne Sabbathen niet, Ende ic worde onder haer ontheylicht.

27

Dijne Ouerheeren sijn in v, gelijc verschorende woluen, bloet te storten, ende sielen te verderuen om haerder ghiericheyts wille.

28

Ende dijne Propheten placken ende plaesterense met slijc oft valschen kalc, ydelheden prediken si, ende propheteren haer logenen, ende seggen. Also spreect die HERE God, hoe wel dattet die HERE niet gesproken en heeft.

29

Dat volc inden lande oeffent gewelt, ende si roouen onuersaecht, ende schenden die arme ende allendige, ende si doen den vreemdelingen gewelt ende onrecht

30

Ic soecke onder haer, oft yemant weeren, ende teghenstaen woude, ende die gramscappe keeren woude voor mi, op dat ic dat lant niet en verderue, Maer ic en vant geenen.

31

Daeromme schudde ic mijnen thoorne ouer haer, Ende met dat vier mijnder verbolgentheyt, so maecte ic haerder een eynde, Ende gaf haer also haer verdienste op haren cop, spreect die HERE God.