Den Bybel met groter neersticheyt ghecorrigeert (Liesveltbijbel 1542)

¶ Een bediedinghe in Iosua op Iesum onsen HERE die onse ouerste Priester is.

Dat .iij. Capittel.

[p. *]

1

⁺ENde my wert vertoont Iosua die hooghe priester, ⁺ staende voor den Enghel des HEREN, Ende Sathan tot sijnder rechter siden om hem te wederstaen.

+ A vers 1

+ mat. iiij. Iob .xi. iij.Regum xviij.

2

Ende die HEre sprack totten Sathan Die HERE die Hierusalem vercoren heeft, die ^a straffe v Sathan, Ia die HEERE berispe v. En is dese niet ghelijc eenen brant, dye wt den viere verlost is?

a Dye straffinge gods is hier wederstaen ende verstooren yemandts voornemen oft quaet werc, ende door die machte gods niet toe te laten om voort te varen in sinen voornemen

3

Ende Iosua hadde onreyne cleederen aen, Ende stondt voor den Engel,

4

Dye welcke antwoorde ende sprac tot den ghenen die voor hem stonden, Doet die onreyne cleederen van hem.

5

Ende hi sprac tot hem, Siet, ick heb dijne sonden van v wech ghenomen, ende ic hebbe v costelijcke cleederen aenghetoghen. Ende hi sprac, Set hem eenen reynen hoet op sijn hooft. Doe settemen hem eenen reynen hoet op sijn hooft, Ende toghen hem reyne cleederen aen. Ende die Engel des HEREN stont aldaer.

6

⁺Ende die Engele des HEREN betuychde Iosua ende sprack.

+ C vers 6

7

Also spreect die HERE der heyrscharen In dien ghi in mijnen weghen wandelde, Ende mijne oordinancie hieldet, So sout ghi een ouerste sijn in mijnen huyse, ende mijne voorhouen bewaren, Ende ic wil v geuen van desen die hier staen, dat si v gheleyden sullen.

8

O Iosua du hooghe Priester hoort doch toe, du ende dijne vrienden, die bi di woonen, Want si sijn enckel wonderen, Siet, Ic wil mijnen knecht Zemach laten comen

9

Want siet, op den eenen steen, die ic voor Iosua geleyt hebbe, sullen seuen ooghen sijn, Mer siet ic wil hem wtgroeuen ende wthouwen seyt die HEERE der heyrscharen, ende wil die sonden des seluen lants wech nemen op eenen dach,

10

ter seluer tijt spreeckt die HEERE der heyrscharen, sal een yeghelijck sinen naesten nooden onder den wijnstock, ende onder den vijgheboom.