Den Bybel met groter neersticheyt ghecorrigeert (Liesveltbijbel 1542)

Die straffinghe des HEREN, die hi voorgenomen heeft ouer Israel.

Dat .xij. Capittel

1

⁺DIt is den last ende straffinghe des woorts vanden HERE ouer Israel. Die HERE spreect also, die welck den hemel wtbreet, ⁺ ende dat aertrijc fondeert ende die den mensche den adem gheeft.

+ A vers 1

+ Ie. xi. iij.Reg. xix

2

Siet ic wil Ierusalem tot eenen beker maken, vanden welcken alle volcken rontom haer tuymelen ende onslaep worden sullen. Ia het moet ooc ouer Iuda comen als Ierusalem belegert wort.

3

Ter seluer tijt wil ick Ierusalem tot eenen last steens maken allen volcken, Alle die den seluen opheffen willen, die zullen haer daer aen snijden ende schoren. Ende alle heydenen opter aerden zullen haer daer tegen versamen.

4

Ter seluer tijt, seyt die HERE, wil ick alle dye peerden scou maken, ende haer ruyters bange. Maer ouer Ierusalem wil ic mijn oogen op doen, ende alle dye peerden der volcken plagen, dat si star blint worden

5

Ende die Princen in Iuda zullen seggen in haerder herten. Laet slechts die borgers Ierusalem gesterct zijn inden HERE der heyrscaren haren God.

6

Ter seluer tijt wil ic die hooftlieden Iuda maken als eenen gloeyenden ouen int hout, ende gelijc eenen vierigen brant int stroo, op dat verteert worden beyde ter rechter ende ter slinckerhant alle volcken rontom, ende Ierusalem sal ooc recht als voormaels bewoondt worden op die plaetse daer Ierusalem staet.

7

Ende dye HERE zal die tenten Iuda helpen gelijc in voorleden tijden, op dat hen dat huys Dauids ende die borghers tot Ierusalem niet te hooch en beroemen teghen Iuda

8

Ter seluer tijt sal die HERE bescermen die borgers tot Ierusalem. Ende tzal gescieden, dat die alder swacste op die tijt sal zijn ghelijc Dauid Ende dat huys Dauids sal zijn gelijc Gods huys ⁺ Ende gelijc des Heren Engel voor haer.

+ B vers 8

9

Ende op die tijt wil ic bestaen alle volcken die teghen Ierusalem comen te vernielen

10

Maer op dat huys Dauids, ende op die inwoonders Ierusalem wil ic den geest der ghenaden ende der bermherticheyt wt storten. Alzo dat si op mi sien zullen dien si versmaet ende bespot hebben. Ende si zullen een claginge ouer hem maken, ghelijc alsmen een claghe

[p. *]

voor eenen eenigen gheboren soon maect. Ende sullen ouer hem droeuich sijn, gelijc alsmen ouer eenen eenigen geboren plach droeuich te wesen.

11

Op die tijt sal daer een groote clage sijn tot Ierusalem, gelijc als was die clage tot Hadadrimon, in die leechte Megiddon,

12

Ia dat lant sal claghen een yegelic gheslachte voor hemselfs. Dat geslachte des huys Dauids bisonder, ende hare wiuen ooc bysonder, Dat geslacht des huys Nathan bysonder, ende hare wiuen bisonder.

13

Dat geslacht des huys Leui bisonder, ende hare wiuen ooc bisonder. Dat gheslacht Symei bisonder, ende hare wiuen bisonder.

14

Also alle dye ander geslachten, een yegelic bisonder, ende hare wijuen oock bysonder.