Den Bybel met groter neersticheyt ghecorrigeert (Liesveltbijbel 1542)

Holofernis volc vloot, ende hoe Israel hem na iaechde.

Dat .xv. Capittel.

1

⁺ENde als alle dat heyr hoorde, dat Holofernes onthooft was, so ontuiel hen moet ende raet,

+ A vers 1

2

ende alleen met beuinghe ende ontsich bedraeyt, namen si dbehulp der vluchten, also dat nyemant met sinen naesten en sprac, mer met neder gheneychden doofde, alle dingen achterlatende, haesten si tontgaen den Ebreen, die si hoorden dat ghewapent ouer hen quamen, vliedende door die wegen der velden ende die paden der houelen.

3

Ende doense die kinderen Israel saghen vlien, so volchden si hen, Ende si daelden af, blasende met basuynen, ende huylende achter hen lieden.

4

Ende want dye Assyriers niet vereenicht hen onberaden ter vlucht begauen, ende die kinderen Israels met eender scharen veruolchden, so scheynden sise alle, dye si mochten vinden.

5

Ende Ozias seynde boden door alle die steden ende lantschappen van Israel,

⁺ Ende hierom seynde alle lantschap, ende elcke stadt haer wtgecoren gewapende ionge mannen na hen, ende veruolchdense metter scherpten des sweerts, tot dat si quamen totten wtersten haerder eynden.

+ B vers 5

6

Mer die ander die in Bethulia waren, sijn inden heyrlegher der Assyriers ghegaen, ende den roof dien de assiriers vluchtende achtergelaten hadden, dien namen si wech, ende si sijn seer gheladen.

7

⁺Ende die ghene die den strijt gewonnen hadden, sijn weder ghekeert tot Betuliam, ende si nament al wech, dat hen toebehoorde also datter geen getal en was van beesten, ende van vee ende in allen haren haueliken goeden, also dat si alle vanden meesten totten minsten rijc worden van haren beroouingen.

+ C vers 7

8

Mer Ioachim die ouerste bisschop van Ierusalem, quam tot Bethuliam, met alle den ouders, dat si Iudith souden sien,

9

Die welcke alse tot hen wt gegaen was, hebben sise al ghebenedijt met eender stemmen seggende.

10

⁺Ghi sijt die glorie Ierusalems ghi sijt die blijschap Israels, ghi sijt die eerlickheyt ons volcx, want ghi hebt manlijc ghedaen, ende v herte is ghesterct, om dat ghi die reynicheydt bemint, ende dat ghi na uwen man geenen anderen gheweten en hebt,

+ D vers 10

11

daerom heuet v die hant des HEREN gesterct, Hierom sult ghi ghebenedijt sijn inder eewicheydt, Ende allet volc seyde. Het geschie, het geschiede.

12

Ende die roouen der Assyriers en sijn nauwelijck binnen dertich dagen, vanden volcke Israel vergadert. Mer alle die dinghen diemen heeft beuonden, dat Holofernes eygen waren, die hebben si Iudith gegeuen in gout, ende in siluer, ende cleederen, ende peerlen, ende alle huysraet, ende si sijn alle ouergeleuert vanden volcke, Ende alle dat volc verblijden met wijuen ende maechden, ende iongen in organen, ende herpen.