Den Bybel met groter neersticheyt ghecorrigeert (Liesveltbijbel 1542)

Die Apostel declareert door dat exempel van Abraham, dat tgelooue van noode is totter salicheyt, ende dat die oude wet totter salicheyt niet ghenoech en is.

Dat .iiij. Capittel

1

⁺WAt seggen wi dan van onsen vader Abraham, dat hi geuonden heeft nae den vleessche? dat seggen wi/

+ A vers 1

2

Ist dat hi rechtueerdich gemaect is gheweest wt die wercken, so heuet hy roem, maer niet voor God.

3

Maer wat seyt die scriftuer? Abraham geloofde God, ende tis hem gerekent tot rechtueerdicheyt

4

Mer den genen die werct, dien en wort dat loon niet gerekent wt genade, mer wt sculden,

5

maer den ghenen die niet en werct, ende gelooft in hem, die welcke rechtuaerdich maeckt den boosen oft godloosen, ⁺ zijn gelooue wort hem gerekent tot rechtuaerdicheyt

+ B vers 5

6

Gelijc dat Dauid seyt, ⁺ dat die salicheyt si den menscen, den welcken God gherechticheyt toe rekent sonder dye wercken, daer hi spreect,

+ Psalm. xxxi.

7

Salich sijn die menscen den welcken haer ongerechticheden vergeuen sijn, ende dien haer sonden bedect sijn,

8

Salich is die man, wien dye HERE gheen sonde toe en rekent

9

Gaet dan dese salicheyt ouer die besnijdenis, oft onbesnijdenisse? Wi moeten ymmer seggen, dat Abrahe sijn gelooue is gerekent tot rechtuaerdicheydt.

10

In wat manieren ist hem dan gherekent? inder besnijdenisse, oft in die onbesnijdenisse, Niet in die besnijdenisse, mer in die onbesnijdenisse,

11

ende dat teeken der besnijdenisse ontfinc hi tot een segel van die rechtueerdicheyt des geloofs, welc hi noch hadde in die onbesnijdenisse, op dat hi soude sijn een vader van alle geloouige

[p. *]

menschen in die onbesnidenisse, op dat haer ooc soude worden gerekent tot der rechtuerdicheit

12

ende worden een vader der besnijdenisse, niet alleen den ghenen die van die besnijdenisse sijn, mer ooc den ghenen die daer wandelen in die voetstappen des geloofs, die daer was in die onbesnijdenisse Abrahe ons vaders.

13

⁺Want die beloofte dat hi een erfgename der werelt soude sijn, en is Abrahe noch sinen sade niet ghesciet door die wet, mer door die rechtuerdicheit des geloofs,

+ C vers 13

14

want ist sake dat die gene die vander wedt sijn, erfgenamen sijn, so ist geloue wt, ende die belofte is om niet, want die wet en werct niet dan gramschap

15

Want daer gheen wet en is, daer en is gheen ouertredinge,

16

Daerom is die beloofte geschiet door tgelooue, op dattet ginge na der gratie, waer mede de genade beuestiget soude worden allen sade. Niet den genen alleene die vander wet sijn, mer ooc den ghenen die vanden gelooue Abrahams sijn die een vader is van ons allen. ⁺ Als gescreuen staet.

+ gene. xvij

17

Ic heb v geset tot eenen vader van veel Heydenen voor God, die ghi gelooft hebt, die die ^a dooden leuendich maect, ende roept tgene dat niet en is, dattet si.

a Door de dooden ende dat niet en is verstaetmen dye gene die haer seluen niet en achten, ende ooc niet gheacht en werden inder werelt.

18

Ende hi geloofde op hope daer niet te hopen en was op dat hi werden soude een vader van veel Heydenen, gelijc tot hem gheseyt is,

19

also sal v saet sijn als die sterren des hemels, ende als dat oeuersant der zee. Ende hi en wert niet cranc int gelooue, hi en mercte oft aensach ooc niet sijn eygen lichaem, welc verstoruen was, doen hi bi hondert iaer out was, ooc niet dat verstoruen lichaem van Sara,

20

want hi en twifelde niet aen die belofte Gods door ongelooue, mer hi wert sterc int gheloue, ende gaf ^b God den prijs,

b God den prijs gheuen, dat is niet twifelen aen die beloften Gods

21

ende hi wist opt alder sekerste, dat so wat God beloofde, dat is hy ooc machtich te doen.

22

Daerom ist hem ooc tot gerechticheit gerekent

23

Mer dit en is niet gescreuen, alleen om sinen wille dattet hem toe gerekent is,

24

mer ooc om onsen wille, den welcken dat ooc sal gerekent worden, ist dat wi gelouen aen den ghenen, die onsen HERE Iesum Cristum verwect heeft, vander doot

25

die gheleuert is om onsen sonden wille, ende verwect om onse rechtuerdicheyt