Den Bybel met groter neersticheyt ghecorrigeert (Liesveltbijbel 1542)

¶ Die Apostel bethoont hier hoe dat hi om tweederley saken niet ghecomen en is totten Corinthen, te weten dat hi niet bedroeft en ware, ende op dat hi elders meer vrucht doen soude, ende seyt daer na wat vruchten, daer hi die valsce propheten wt sluyt

Dat .ij. Capittel.

1

⁺DIt heb ic bi mi seluen besloten, op dat ic anderweruen tot v niet en quame in droefheyt,

+ A vers 1

2

Want ist dat ic v bedroeue, wie ist die mi vrolic sal smaken, dan die ghene dye van mi bedroeft werdt?

3

Ende dit selue heb ic v ghescreuen, op dat ic niet, wanneer ic quame deen droefheyt ouer die ander en soude hebben, van die welcke ic mi verblijden soude, aengesien dat ic mi dat betroude, dat mijn vruecht uwer alder is,

4

want ic scrijue v in groter tribulatien ende bangicheit des herten, ⁺ met veel tranen, niet om dat ghy bedroeft sout werden, mer op dat ghi die liefte bekennen soudt, die ic sonderlinge tot v hebbe.

+ B vers 4

5

Ist dat v yemant eenige bedroefnisse heeft aen gedaen, die en heeft mi niet bedroeft, niedt dan een luttelken, op dat ic v alle niet en besware,

6

Het is genoech dat die selue also vander vergaderinge gestraft is,

7

op dat ghi hem voortaen, dies te meer vergheeft ende troost, op dat hi niet in alte groter droefheit en verdrincke,

8

Daerom vermane ic v, dat ghy die liefde aen hem den voortganc laet hebben,

9

Want daerom heb ic v ooc gescreuen, op dat ic bekennen soude, oft ghi beproeft sijt, gehoorsaem te sijn in alle stucken.

10

Want so wie ghi yet vergeeft dien vergeue ict ooc, ⁺ Want ist dat ic ooc yemant wat vergeue, dat vergeue ic om uwent wille, inder stadt Cristi,

+ D vers 10

11

op dat wi niet bedroghen en werden vanden Duuel, Want ten is ons niet onbekent wat hi inden sin heeft.

12

Mer doen ic tot Troada quam om te prediken dat Euangelium Cristi, ende mi een duere open ghedaen was inden HERE,

13

⁺so en had ic geen ruste in mijnen geest, om dat ic Titum den broeder niet en vant, maer ic maecte mijn afsceydinge, ende ic voer wt in Macedonia.

+ D vers 13

14

Mer God si gedanct, die ons altijt dat velt helpt behouden in Cristo, ende openbaert den ruec sijnder kennisse, door ons in alle plaetsen,

15

Want wi sijn Gode eenen goedertieren ^a rueck Cristi, beyde onder den ghenen die salich worden, ende onder den ghenen die verloren werden,

a rueck dats goeden naem, ende bi hem gheacht exo. v.d.

16

desen eenen rueck des doots, totter doot, mer den genen eenen rueck des leuens totten leuen. Ende wie dooch daer toe? Want wi en sijn niet gelijc sommige vele, die ^b cremerie bedrijuen,

b Cremerie bedrijuen, dat is dwoordt Goods valscelijc wtleggen heb. iij.d.

17

mer als wt puerheyt ende als wt God, voor God spreken wi in Christo.