Den Bybel met groter neersticheyt ghecorrigeert (Liesveltbijbel 1542)

¶ Die Apostel waerschout die van Thessalonica vanden toecomenden daghe des doots, ende van dat oordeel Goods int generael, ende vermaentse dat si haerlieden wel hebben sullen teghen haren naesten ende haren God.

Dat .v. Capittel.

1

⁺MAer vanden tijden ende stonden, lieue broeders, en is niet noot te scrijuen.

+ A vers 1

2

Wandt ghi selue weet, ⁺ dat den dach des HEREN sal comen, ghelijck een dief inder nacht.

+ ij.Pe. iij c.

3

Want als si sullen seggen, het is vrede, daer en is gheenen vaer, so sal dat verderuen snellic ouer hen allen comen, gelijc dye wee ouer een beuruchte vrouwe, ende en sullen niet ontulien,

4

Mer ghi, lieue broeders, ⁺ sijt nyedt in duysternissen dat v dien dach ghelijc een dief begrijpe.

+ apo. iij a

5

† Ghi sijt alte same ^a kinderen des lichts, ende kinderen des daechs, * Wi en sijn niet vander nacht, noch vander duysternissen.

a Kinderen des lichts, dat sijn die, dye dat gheloue hebbe ende die kennisse Gods. Prouer. iiij.c esa. lix d eph. vi a

6

Hierom so en laet ons niet slapen, ghelijc die anderen, mer laet ons waken, ende nuchteren sijn,

7

want die daer slapen, dye slapen des nachts, ende die daer droncken sijn, die sijn snachts droncken,

8

Maer wy die des daechs sijn, sullen nuchteren sijn, aengedaen metten creeft des geloofs ende der liefden, ende met den helm der hopinghen op die salicheyt,

9

Want God en heeft ons niet gesedt tot gramscappen, ⁺ mer die salicheyt te verweruen door onsen HERE Iesum Christum,

+ B vers 9

10

die voor ons ghestoruen is, op dat, weder wi waken oft slapen, gelijc met hem leuen souden,

11

Daerom, vermaent v onder malcanderen, ende sticht die een den anderen gelijc ghi ooc doet.

12

Wi bidden v lieue broeders, dat ghi bekent dye aen v arbeyden, ⁺ ende voorstaen inden HERE, ende vermanen v,

+ C vers 12

13

houtse dies te meer in die liefde, om haers wercx willen, ende sijt vreedsaem met haer lieden.

14

† Wi vermanen v lieue broeders, vermaent die ongeordineerde, troost die cleynmoedige, verdraecht die crancken sijt lancmoedich tegen alle menschen,

15

Siet dat niemant quaet met quade yemanden en vergelde mer altijt staet na dat goet is, onder malcanderen ende tegen alle menschen,

16

Sijt altijt vrolijc,

17

bidt sonder ophouden, ⁺ sijt dancbaer ouer al,

+ D vers 17

18

Want dat is die wille Gods in Christo Iesu aen v.

19

Den geest en blust niet wt,

20

Die prophecie en veracht niet,

21

Proeuet al, ende dat goet is dat behoudt

22

Midet alle quade schijnen,

23

hi die God des vreden make v heylich door al, op dat uwen geheelen ^b gheest ende

b geest, dat is de werckinghe Godes inden mensche.

[p. *]

^a siele ende lichaem moeten behouden werden onberispelic op die toecomst des HEREN Iesu Christi. *

a Siele, dat is dat natuerlic leuen. Dlichaem dat is dinstrument van beyden

24

Ghetrouwe is hi die v roept, welc salt ooc doen,

25

Lieue broeders, bidt voor ons,

26

Groetet alle die broeders met den heylighen cusse,

27

Ick beswere v byden HERE, dat ghi die Epistel laet lesen alle heylige broeders,

28

Die genade ons HEREN Iesu Cristi si met v Amen.

¶ Tot den Thessalonicenssen die eerste is ghescreuen van Athenen.