Den Bybel met groter neersticheyt ghecorrigeert (Liesveltbijbel 1542)

Hier beghint die eerste Epistel van sint Ian.

Die Apostel sint Ian bewijst dat nyemant God lief en heeft dan die volbrenghen die gheboden Gods, ende dat nyemandt salich en wordt, dan die belijen dat Iesus is die sone Gods.

Dat .I. Capittel

1

⁺DAt van beginsel was dat wi ghehoort hebben, dat wi ghesien hebben met onsen oogen, dat wi beschout hebben, ende onse handen ghetast hebben, van dat woort des leuens,

+ A vers 1

2

ende dat leuen is gheopenbaert, ende wi hebben ghesien ende tuygen, ende vercondigen v dat leuen, dat eewich is, welck was byden vader, ende is geopenbaert,

3

Wat wi gesien ende gehoort hebben, dat vercondigen wi v, op dat ghi ooc met ons gemeynscap hebt,

4

ende onse ghemeynscap si met den vader, ende met sinen sone Iesu Cristo, Ende dat scrijuen wi v, op dat ghi v verblijt, ende v vruechde volcomen si.

5

⁺Ende dat is die vercondinghe die wi van hem gehoort hebben ende v vercondigen, dat God een licht is, ende in hem en is gheen duysternisse,

+ B vers 5

6

Ist dat wi seggen, dat wi ghemeynscap met hem hebben, ende wandelen in duysternisse, so lieghen wi, ende en doen nyet die waerheyt.

7

⁺Ist dat wi int licht wandelen, ghelijc hi int licht is, soo hebben wy ghemeynschap onder malcanderen, ende dat bloet Cristi maeckt ons reyn van alle sonden.

+ C vers 7

8

Ist dat wi segghen, wy en hebben gheen sonde, so verleyen wi ons seluen, ende die waerheyt en is in ons niet,

9

⁺Mer ist dat wi onse sonden bekennen, so is hi getrouwe ende gerechtich, ⁺ dat hi ons die sonden vergheue ende reynicht ons van alle ongerechticheit,

+ D vers 9

+ heb. ix.b Apo. i.b

10

Ist dat wi

[p. *]

seggen, wi en hebben niet ghesondicht, so maken wi hem tot eenen loghenaer, ende sijn woort en is nyet in ons.