Den Bybel met groter neersticheyt ghecorrigeert (Liesveltbijbel 1542)

Die Apostel bethoont hoe Christus beter dienaer is, dan dye dienaren des ouden Testaments.

Dat .viij. Capittel.

1

⁺DIe summe vanden genen dat geseyt is, is dese, Wi hebben eenen hoogen priester die geseten is totter rechter hant des stoels der maiesteyt inden hemel,

+ A vers 1

2

ende een bediender der heiliger goeden, ende der warachtiger hutten, welc God opgherecht heeft, ende geen menscen.

3

Want een yegelic hooge priester wort ingeset te offergauen ende te offeren, waer wt dat noot is, dat dese ooc wat hebbe dat hi offere,

4

Waert dat hi nv opter aerden ware, so en waer hi geen priester alsser sijn die na die wet gauen offeren,

5

die welcke den beelde ende die scaduwe der hemelscer goeden dyenen, so die Godlike antwoort tot Moysen seyde, doen hy den tabernacule soude volmaken. Siet toe, seide hi, dat ghijt al na den beelde maect, dat v op den berch ghe-toont is.

6

Maer nv heeft hi een veel beter ambacht vercregen, soo vele hi eens beteren testaments middelaer is, dwelc op betere beloften geuesticht is,

7

want waert dat dander eerst onsculdich geweest ware, so en soude geen plaetse tot eenen anderen gesocht werden,

8

⁺Want hi besculdichtse, ⁺ ende seyt, Siet die dagen comen, seyt die HERE, dat ick ouer dat huys Israel, ende ouer dat huys Iude, een nieu testament volbrengen wil,

+ B vers 8

+ ex. xxv.d

9

niet na den testamente dat ic met haren vaderen gemaect hebbe, inden dage doen icse met haren vaderen gemaect hebbe inden dage doen icse metter hant nam, om wt den lande van Egipten te leyden, want si en sijn in mijn testament niet gebleuen, ^{+ +} ende ic en hebse ooc niet geacht, of ick en hebse ooc geen gay geslagen, seyt die HERE.

+ C vers 9

+ hie. xxi.a

10

Want dat is dat testament, dat ick den huyse Israhel na dyen dagen maken wil, seyt die HERE, Ic wil mijn wetten in haren sinnen geuen, ende ic wilse in haer herten scriuen,

11

ende ic wil hen een God sijn, ende si sullen mi een volc sijn, Ende een yegelic en sal sinen naesten niet meer leeren, ende een yegelic sinen broeder seggen. Bekent den HERE, want si sullen mi alle kennen, vanden cleynsten totten grootsten,

12

want ic wil haerder ongherechticheyt ende haer sonden genadich sijn, ende ic en wil haerder ongerechticheyt niet meer gedencken.

13

In dyen dat hi seyt een nyeu, so veroudt hi dat eerste. Mer wat verout ende veriaert is, dat is na bi sinen eynde.