Volksboek van Margarieta van Lymborch (1516)

Hoe dat arnout heyndric verloste, ende gaf hem helm/ schilt/ harnas/ ende swert. ende hoe heyndric den coninc van beemen thooft af sloech. ende den hertoghe van loreynen quetste, dat hi ter aerden viel ende daer af sterf.

Dat. XLVIJ. capittel.

DOEN arnout van ardennen dat vernomen hadden dat si heyndric gevanghen hadden, ende hem doden wilden. so nam hi heyndricx wapen die si hem wt gedaen hadden al heymeliken. ende hi ginc in die tente daer heyndric gebonden stont ende seyde tot hem, o heyndric sijt blijde. ic sal u vertroosten, ghi hebt mi eens vertroost. ic moet der geliken doen. ende hi ontbant heyndric. ende gaf hem sijn wapen. harnas/ schilt/ ende swert/ ende seyde. hoe sidy nu gehert. Heyndric die sprac tot arnout herde wel. ende ic dancke u der trouwen die ghi mi hyer doet. comt dit noch eens te pas dat sal u geloont sijn. Doen seide arnout. tis gaerne gedaen want ic en doe niet anders dan ic schuldich ben van doen. mer ic wil vertrecken van hier tot lymborch bi uwen vader. ende gheven hem te kennen die verraetscap die die bisscop aen u getoont heeft. ende ghi hem grote ghetrouwicheyt gedaen hebt. Doen seyde heyndric. o lieve arnout gruet my mijn vader ende moeder seer. ende segt hem dat ic ben nae athenen. mer ierst sal ic orlof nemen aenden coninc ende aenden hertoge eer ic vertrecken sal. Doen seide arnout dat waer grote sotheit. si souden u verlasten. mer heyndric en was dat niet tontraden. hi en woudet ierst doen. Aldus scieden si van malcanderen. arnout die reysde nae lymborch ende heyndric ginc in die tente, daer die coninc van beemen. ende die hertoge van loreynen saten. Doen spac heyndric hier ben ic ooc. ghi woudt mi al vierendeelen ende doden. ende die stucken wech senden. dat ic nu beletten sal. Heer coninc weert u. si riepen te wapen. mer twas te laet. heindric sloech den coninc dat hooft af. ende den hertoge die quetste hi also. dat hi bleef ligghen op die aerde dat hijer af sterf Aldus nam heyndric een paert ende sadt daer op. ende hi reet wech. Dat gerucht quam int heyr. ende in die stadt van triere. dat dese heren verslagen waren. Die bisscop en was niet wel te vreden. also en was die ghemeente ooc. want si seiden wi hebben alte qualiken gedaen. ende noch salder ons quaet af comen. dat wi den ridder die ons duecht dede hebben quaet ghedaen. Ende hem verraden ende gelevert inden handen van sinen vianden. plaghe ende orloghe salder ons noch af comen alst sijn vader vernemen sal. die hertoghe van lymborch. ende wi sijn seker een groter orloghe. dan wi gehadt hebben Aldus waren si in sorghen. ende in laste. daer si hem selven inghebracht hadden. verwachtende groote orloghe.