Volksboek van Margarieta van Lymborch (1516)

Hoe die bode quam aenden coninc van vrancrijc. ende hoe etsijtes ende evac mede toghen metten bode. om den coninc van arragoen tontsettene.

Dat. LXXV. capittel.

ALS die coninck lodewijc dese ridders goede chiere dede dat si hem bedancten. so quam die bode van arragoen in die sale van den coninc lodewijc ende hi bracht hem eenen brief. mer eer hi hem den brief gaf. so gruete hy seer den coninc de fluerdelijs met schoonder grueten. ende hi custe den brief. ende hi gaffen doen die coninclike maiesteyt. ende hi seyde. heer coninc over leesten ende gheeft my een antwoort op die sake. want ic haesteliken wederomme moet bi onsen coninc van arragoen die beleghen is in sijn stadt te voucekuer. Als dat die coninc lodewijc van vrancrijck hoorde was hi seer bedruct. ende hi dede den brief leesen daer men in vant bescreven. als dat die coninc van arabijen wilde hebben sybilla die coninghinne van arragoen tot sijnder amijen. ende aldus begheerde hi hulpe ende bijstant aen den coninc lodewijc van vrancrijc Als die coninc verstont dinhoudt des briefs. so seyde hi tot etsijtes ende evack. Ghi vrome ionge ridders woudt ghi wel doen. ghy soudt te baten reysen ende te hulpen comen den coninck van arragoen. mijn coninclike maiesteyt die sal u met ghelde ende met volcke bijstant doen. om te weder staen die sarasinen die heydensche honden. Als etsijtes ende evac dat hoorden. so waren si daer seer wel toe gheneycht tot dyer saken. Ende aldus gaf die coninc lodewijc etsijtes ende evac ghelt ende volck mede. om te reysen metten bode nae arragoen. om te ontsetten den coninc terus van arragoen ende die coninghinne. Als si ghelt ende volc al ghereet hadden. so namen si orlof aenden coninc lodewijck. ende si reysden nae arragoen metten bode. so lange reysende ende so seer dat si quamen int landt van arragoen daer theyr lach. Die bode wildese leyden besiden omme wter wege vanden heyr. mer etsijtes ende evac seyden. gaet ghi voor aen den coninc ende segt hem dat hi ons waerneme ende op ons wachte. want wi moeten besien wat die honden vermoghen. Die bode seide. ghi heren ic salt gaerne doen. ende hi liep in die stadt voucekuer int hof vanden coninc daer hijse vant al in die wapenen bereet om tevechten ende seide die bootschap van etsijtes ende evack dat hi hulpe vercrighen soude. mer dat hi waer nemen soude op hem lieden ter poorten. want si hadden voor hem die turcken te bevechten al wasser seer vele. Die coninc nam sijn volc by hem. ende hi dede also hem die bode seyde.

[p. 68]

ende ghinc ter poorten om die heeren al daer te verbeyden die daer quamen om hem bistant te doene Ter wijlen dat die coninc ter poorten was so sloech etsijtes ende evac int heyr dat bi dier poorten lach met haren volcke. so dat si daer met dallen seer vochten. ende si sloeghen doot den amerael van cordes. ende si vinghen den avijstant van palerne. Die mare quam int heyr vanden coninc van arabijen dat die amerael van cordes doot was. ende den avijstant van palerne ghevanghen. dies hy seer droeve was. ende sloech met sinen heyr nae dat heyr toe so datter seere vele lieden bleven aen beyde siden. Etsijtes ende evac sloeghen veel payienen doot. int eynde so sach die coninc van arragoen dat si verladen waren. so sandt hy hem te baten een deel mannen van wapenen. als die payienen saghen dat volc wter stadt comen weeken si achter waert op haer sterckte ende in haer leghers. Ende evack ende etsijtes quamen met haren volcke nae die stadt ende mit haren ghevanghen Die coninc ende die coninghinne die hieten evac ende etsijtes herteliken willecome. ende sy dancten hem seer van haren bijstande. Etsijtes schencte den coninc den avijstandt van palerne als sijn prijsonier ende sijn ghevanghen man. Aldus dancte hem die coninc seere ende die coninghinne. ende si leyden hem ter salen waert om te bancketeren. ende om goede chiere te maken. want si seer vermoeyt waren. Die heyden waenden verwoeden van thoorne ende van groten rouwe om dies wille dat si die schade vercreghen hadden van eenen hoop kerstenen. die met also cleender machte quamen in haren hoope ghesleghen. Doen sprack die soudaen al van monbrant ende seyde dat hy sach daer twee ionghe ridders in den hoope die welck ons volck al vernielden ende te niet deden met haerder mandaet. ende met haerder ghewelt. bi den welcken dat ic duchte dat ons die twee noch meer sullen hinderen. ende ons schade bewijsen. Doen sprac die coninc alant van barbarijen. schade hier oft hinder daer. ic en sal van te voren van voucekuer niet scheyden ic en hebbe mijnen wille daer van. oft ic sal daer voor sterven. Ende soude ic mi versaghen ende ontsien om eenen oploop die wi ghehadt hebben. ende om tvolc dat ic verloren heb. neen ick niet. want ten is noch maer ghedobbelt om den steen. ende dat speel en is noch maer begonnen. Als sijn heren dat hoorden so antwoorden si allen ende seyden. heer coninc alant heere van barbarijen. wi blivens u by. ende sullen u die arragoensche helpen minderen ende onder die voeten brenghen also dat hem gruwelen sal dat si noyt gheboren waren. Doen sprac yvorijn van monbrant. ic salse also vernielen met mijnen volcke datmen over hondert iaren af sal weten te spreken. Des ghelicx so seide ooc ferant van persen ic swere u dier gheliken te doen. Ende voort so seyde doen die ionghen corborant van tateren. ic sal u alsulcken bistant bewijsen mit mijnen taterensche dat ghijs mi eeuweliken bedancken sult Doen dat die coninc hoorde dancte hy die heeren te samen. ende hi beval yvorijn van monbrant die schaer wake. ende dat sy hem elck bereyden souden om den coninc te bevechten. daer si alle willich toe waren. ende elck ghinc om te rusten in sijn tente. Ende yvorijn van monbrant die bestelde die wake dien nachte. ende hi verwaerde dat heyr. ende hy hielt selve die schaerwake.