Niederrheinische Liederhandschrift von 1574

[fol. 78v]

[Jch hat mich vnderwůndenn]

1. Jch hat mich vnderwůndenn,
Wolt dienen einem Freweleinn feinn
Sey sneydt mir dieffe wůndenn
Dem Jůngenn hertzenn mein,
Wolt Got solt ich ihr dienenn
Jr stediger diener sein,
vnnd were es ihr gefelligh,
Jr eigenn wolt ich sein.

2. Jch was erst zu ir kommenn,
Verschwůnden was mir mein redt,
Jch wardt zů einem stůmmenn
Als ich vernohmen hette,
Jch dorft nicht vmb sey werbenn,
Es war allein mein schůlt,
Vil lieber wolt ich sterbenn,
Ehe ich verleůr ihr holt.

[fol. 79r]

 

 

 

3. Wie sol ich mich darinn schickenn

 

Wie soll ichs greiffenn ahn

 

Jch hab so gar kein glůcke

 

Jch binn ein trawrich mahnn,

 

Feins lieb laes dich erbarmenn,

 

Mein kůmmer vnnd groese noet,

 

můes ich dich fahrenn laessenn,

 

vill weger wer mir der todt.

 

 

 

4. Da gab im nů die reine

 

Gar einenn freůndtlichenn kůß,

 

Das frewelein fingk ahn zů weinenn

 

vnnd schmůckt in ahn ihr brůst

 

Feins lieb laes dich erbarmenn,

 

mein kůmmer vnd groese not,

 

Jch will dich nicht vfgeben

 

schaft lieb dein můntlein roedt.

 

[fol. 79v]

 

 

 

5. Dieß liedlein das ist gesůngenn,

 

Aůs trawrigenn můede

 

Vnfal hat mich verdrůngenn,

 

Jch hoffenn es werdt noch gůet,

 

Jch wil die zeit erwartenn,

 

bis vf die selbe stůndt

 

moeß ich dich fahrenn laessen,

 

So spar dich Got gsůndt.